الاستبيان عبارة عن 32 أغلبها اختيارات متعددّة، وبالكثير ما راح ياخذ منك الا خمس دقايق بس.

رابط الاستبيان

السالفه ومافيها، ندوّر مصمّم جرافيكس ينضم لفريق العمل في الموقع ويصير جزء منه عشان يساعدنا نطوّر الاشياء اللي نقدمها أكثر وأكثر. كل اللي يهمنا انه:

• يكون راعي العاب كمبيوتر، مو واحد ما يعرف اي شي عن الالعاب.
• عنده حس فني حلو ويعرف يسوي تصاميم جميله ببساطتها، مو شغل الزبرقه حق المنتديات.
• يلتزم بمواعيده.
• مهتم لتطوير سعودي جيمر وتقديم الأفضل لمتابعينه، ويبادر بالعمل، يعني ما يكون من النوع اللي ينتظر احد يقول له وش يسوي.

ويفضّل انه (لكن مو ضروري):

• تكون عنده مهارات اضافية لها علاقه بالتصميم (رسم، انميشن، مونتاج…الخ).
• يكون احد متابعين سعودي جيمر.
• يكون في الرياض.
• يكون فوق الـ18، عشان اذا طلعنا سوا ما يصير شكلنا شبهه (ولا بنضطر نخلي فيصل ما يجي )

واذا ما كنت مصمّم جرافيكس فياليت تساعدنا وتنشر الموضوع

ملاحظة: اذا ما تدري وشو RSS وما تستخدم اي برنامج قاريء RSS زي Google Reader او غيره فما يهمك هالموضوع.

غيرنا اليوم عنوان خلاصة RSS الخاصة بالموقع بحيث يصير عندنا عنوانين، واحد خاص لحلقات البودكاست فقط، والثاني شامل لجميع مواضيع الموقع.

كيف بيأثر هالشي عليك؟

• اذا كنت تتابعنا من Google Reader او اي برنامج قاريء خلاصات ثاني، بتحتاج تغير عنوان الاشتراك حقك الى العنوان التالي: http://feeds.feedburner.com/saudigamer_site
• اذا كنت تتابعنا من iTunes او اي برنامج بودكاست، فبتصير عندك امكانيه انك تحمل حلقات أكثر بكثير من السابق. قبل التغيير كنت اقدم حلقه تقدر تحملها هي الحلقة 112. الآن اقدم حلقه تقدر تحملها هي حلقة 42!

هالشي ان شاءالله راح يحل عدة مشاكل اشتكى المستمعين منها، ويعطيك كمستمع تجربة افضل ان شاءالله.

اذا لاحظت اي مشاكل بعد التغيير فياليت تكتبها لنا في التعليقات.

يوم السبت ان شاءالله بنسجل حلقة خاصة عن أفضل ألعاب سنة 2011.

المختلف هالمره انه بيكون بامكانك تستمع للحلقة خلال تسجيلنا لها بشكل مباشر، وتتفاعل معنا عن طريق تشات كتابي في الموقع بحيث ناخذ رأيك في الحلقة ونتكلم عنه مباشره.

يوم السبت الساعه 8 مساءاً ان شاءالله بينزل موضوع في الموقع بتقدر  عن طريقة انك تستمع للحلقة وتكتب تعليقاتك خلال (او قبل) استماعك (راح نبدا تسجيل واذاعة الحلقة الساعه 9)

ندري انه وقت اختبارات، بس هذا شي من صالحنا لانه نتوقع تصير فيه شوية مشاكل تقنية في البث المباشر بما انه اول مره نسويها (يعني لا تدقق واجد اذا جيت ). واذا ما كنت تقدر تحضر فمخططين نسجّل البث وننزله كحلقه عادية ان شاءالله يوم الاحد.

راسلونا عدة اشخاص يسألوننا عن سبب عدم نزول الحلقة 135 على تطبيق iTunes في الآيفون. المشكلة باختصار من iTunes ماهي مننا. وبالمناسبة اللي يتابعون حلقاتنا عن طريق برنامج iTunes على الكمبيوتر ما راح تواجههم اي مشاكل في ظهور الحلقات الجديدة ان شاءالله.

آبل عادة تشيّك على موقعنا كل 24 ساعة، عشان كذا تتأخر ظهور حلقاتنا الجديده شوي. الاسبوع هذا يبدو ان الموضوع اخذ اكثر من 24 ساعه، وفيه عدد من برامج البودكاست الثانيه اللي متأثره بهالمشكله. الآن تطلع آخر حلقه في موقع iTunes، لكن مو راضيه تطلع في تطبيق الجوال.

كحل مؤقت بامكانك اما:

• تنزل ملف الحلقة 135 وترميه للـiTunes في الكمبيوتر وهو يرسلها لآيفونك (زي ما تسوي مع اي اغنيه).
• والطريقة الأسهل انك تشترك بالبودكاست عن طريق برنامج iTunes على الكمبيوتر بحيث ينزل لك الحلقات الجديدة تلقائياً كل ما تشبك آيفونك فيه. كل اللي عليك تسويه هو انك تنزل برنامج iTunes في جهازك ثم تضغط زر “اشتراك باستخدام بنرامج iTunes” الموجود في الجهه اليسرى من هذي الصفحة.

آسفين على المشكله. مافي يدنا شي نسويه عشان نحلها، لكن ان شاءالله انها تنحل من آبل في اسرع وقت.

كل عام وانتم بألف خير جميعاً بمناسبة عيد الأضحى المبارك، نتمنى لكم اجازه رهيبه مليئه باللحوم (نقصد اللي تاكلها) والالعاب القويه.

شوية تحديثات تخص اشياء سويناها او بنسويها هالاسبوع:

• عدلنا شوي على تصميم الموقع، يا ليت تعطينا ملاحظاتك ان كان عندك اي ملاحظات عليه.
• فيه مسابقة خفيفه هالاسبوع وجائزتها لعبتين من اقوى ألعاب الموسم.
• بسبب العيد والاجازه والالتزامات اللي موجوده فيهم، بنضطر نأجل الحلقة 129 الى بعد العيد…
• … ولكن فيه حلقه خاصة نحلل فيها Uncharted 3 بتنزل بكره (الاحد) ان شاءالله
• بنعلن عن شي كبير حصل للموقع خلال الايام القادمة ان شاءالله.

وسلامتكم

آسفين على التأجيل. بنجتهد بحيث تكون الحلقة تستحق الانتظار ان شاءالله.

خلال هذي الفتره يمكن ننزّل كم فيديو من رحلتنا الى Gamescom اذا لقينا شي يستاهل، فتابعنا في تويتر او عطنا لايك في فيسبوك عشان يوصلك اي جديد في الموقع.

آسفين جداً على التأخير بس صار لظروف خارجه عن ارادتنا.

بالمناسبه شكراً لجميع اللي ارسلوا ملاحظاتهم عن الحلقات السابقة. مخطّطين لاشياء قادمه لتطوير البودكاست ان شاءالله انها بتعجبكم.

التغطيه (مثل ما سوينا في معرض Gamescom) ماهي تغطيه مباشره. فيه عدة مواقع عربيه جالس تغطي اخبار المعرض بشكل ممتاز مباشره وبسرعه وما يحتاج نسوي مثلهم. كالعاده بيكون تركيزنا على النقاش في حلقات البودكاست “بعد” المعرض لمناقشة التجربه كامله بعد الانتهاء منها بالاضافه الى عدد من تقارير الفيديو واخيرا والاهم: الاجابه على اسئلتكم اللي سألتونا اياها عن الالعاب والاجهزه المعروضه.

تركيزنا عادة على تحليل ومناقشة الاخبار والتجارب في البودكاست اكثر من تركيزنا على سرعة نشر الخبر، فآسف لكل من خيبنا ظنه او ما وافقنا توقعاته من هالناحيه. لكن ان شاءالله الحلقه الخاصه بعد المعرض راح تكون مرضيه للمستمعين.

جرّب تحط تعليق فيها ساعدنا نختبرها، ونتمنى انك تشاركنا اذا عندك اي ملاحظات او واجهت اي مشاكل فيها.

بالنسبه للحلقه 100 راح نسجّلها الخميس وننشرها الجمعه. هذا توقيت استثنائي للحلقه 100 فقط، حبينا نختار وقت نضمن فيه ان الجميع ان شاءالله يكونون موجودين وبكامل نشاطهم (بدال ما يجون منتّفين بعد الدوام يوم السبت ). بعد كذا ابتداء من الحلقه 101 بترجع الحلقات لوضعها الطبيعي ان شاءالله وتصير تنزل كل يوم أحد بعد العشا كالعاده.

بالمناسبه، الحلقه 100 بتشهد تغيير كبير في البودكاست. فنتمنى انه الجميع يستمع لها ويعطينا رأيه فيه.

خلال هالاسبوع بامكانك تشاركنا النقاش في بعض الاخبار اللي راح ننشرها في صفحتنا في الفيسبوك او حتى تساعدنا في تجميع أفضل المقاطع من البودكاست عشان نحطها في الحلقه الخاصه اللي بننشرها قريباً ان شاءالله

نعتذر لكم عن هذا التأجيل بس كانت لظروف خارجه عن ارادتنا.

مثل ما ذكرنا في الحلقه السابقه (واللي قبلها) في البودكاست، نحتاج مساعده في تجميع أفضل مقاطع البودكاست من أول حلقه الى الآن (سواء كانت مقاطع مضحكه او مفيده او غيره). الهدف من هالشي اننا – بمناسبة الحلقه 100 – بننزّل حلقه كامله عباره عن أفضل المقاطع الموجوده اللي اعتقد كلنا بنستمتع فيها ان شاءالله.

وصلتنا عدة ردود تدعمنا عن طريق الايميل، لكن حبينا نطرح الموضوع هنا على اساس تصير اقتراحات المقاطع في الردود بحيث عشان نوفّر الوقت على الجميع ويصير لو شافوا احد كتب أفضل مقاطع في حلقه معينه ما يروحون يسمعون نفس الحلقه، وتصير العمليه منظّمه عموماً..

طريقة المشاركه ببساطه تكتب رقم الحلقه + وقت المقطع اللي اعجبك (مثال: 01:10:30) + مختصر بسيط عن المقطع (مثال: يوم فلان قال كذا وكذا).

ألف شكر مقدّماً لكل اللي حابّين يشاركوننا بهالمهمّه

الحلقه 90 بتنزل ان شاءالله بكره الاثنين بالليل. التأجيل بيساهم ان الحلقه تكون أفضل وأمتع ان شاءالله.

الاستفتاء عباره عن 21 سؤال خفيف، وما راح ياخذ منك أكثر من 5 دقايق من وقتك، ومشاركتك ورأيك مهمين جدا بالنسبه لنا، فنتمنى انك تشارك في الاجابه.

رابط الاستفتاء

وشكراً لك مقدما!

• الأسبوع القادم ما راح يكون فيه حلقه لظروف اجازة العيد، الحلقه القادمه بتكون يوم الأحد 21 نوفمبر ان شاءالله.
• خلال الاجازه بننشر استفتاء خفيف نعرف رأيك بالاشياء اللي نسويها عشان نطوّر مستواها أكثر وأكثر باذن الله.
• خلال الاجازه بعد ناوين نسوي مسابقه خفيفه نوزّع فيها كم نسخة للعبة كول أوف دوتي الجديدة (Call of Duty: Black Ops). مضطرين نأخر المسابقه شوي بسبب تأخّر نسخ اللعبه اللي مفروض توصلنا. المعذره على التأخير.
• بعد الاجازه بنسوي مسابقه ثانيه ان شاءالله بس عاد جوائزها بتكون من العيار الثقيل، والمشاركه فيها بتحتاج شوية تفكير وابداع.

فعشان ما يفوتك شي، اشترك مع حساباتنا في تويتر أو الفيسبوك (اللي ترتاح له اكثر) وبيجيك خبر أول ما ننشر اي شي جديد باذن الله.

نتمنى لك اجازه خورافيه (كنت بقول خاروفيه عشان عيد الاضحى بس حسيت انها بايخه شوي)

حبّيت بس أوضّح ان الجزئيه اللي ذكرناها بتعرفها من بداية الفلم، لأنها هي أصلا الأساس اللي تقوم عليه أمور كثيره ثانيه وماهي النهايه، بس يمكن لأنها غير مألوفه فاعتقد البعض اننا كنا نتكلم عن نهاية الفلم.

بالمناسبة حنا حريصين جدا انه ما نحرق أي شي في قصة أي لعبة أو أي فلم أو مسلسل نجيب طاريه في البودكاست، حتى اذا حرقنا بالغلط فاننا نحذفها بالمونتاج قبل ما ننشر الحلقة.

آسف على الازعاج اللي سبّبه هالشي لبعض اللي ما شافوا الفلم، وان شاءالله نكون أوضح في المرات القادمه عشان نتحاشى أي سوء فهم.

بتكون عودتنا مع الحلقه 79 يوم 19 سبتبمر ان شاءالله.

الى هذاك الوقت، ممكن نضيف مواضيع في الموقع (لان التوقف خاص بالبودكاست فقط)، فنتمنى لو تتابعنا عن طريق الانضمام لصفحتنا في Facebook أو متابعة حسابنا في Twitter عشان يوصلك كل جديد أول بأول.

جلست أحوس في المشغّل شوي وطلع كلامه صحيح. فغيّرته كله الحين وحطيت واحد جديد بداله، وخليته هالمره طويل عشان يخليك تقدر تتحكّم بالحلقة بشكل أسهل بما ان الحلقات طويلة عادة وما ينفع لها مشغّل قصير.

اعتذر عن الازعاج اللي سببه المشغّل القديم للبعض.

أبيك بس لا هنت تعطيني رأيك بالمشغّل الجديد وتعطيني خبر اذا واجهتك أي مشكله معه.

واذا عندك أي ملاحظات ثانيه بخصوص البودكاست أو الموقع عموماً فياليت تشاركنا فيها مهما كانت صغيره بنظرك.

كثير كانوا يسألوننا ليش ما نحط معلومات الأخ أحمد الأحمري في صفحة فريق العمل بما انه دايم يشارك معنا في البودكاست، لكن في الواقع هو كان الى فترة قريبه ضيف دائم في البرنامج، ونتشرّف اليوم بالاعلان عن انضمامه رسمياً لفريق العمل على الموقع والبودكاست بشكل عام.

هذا أول توسّع للفريق من يوم ما بدا الموقع، وبرأيي انه اضافه موفّقه للفريق بتساعدنا في اننا نقدّم الأفضل للمستمعين دائماً ان شاءالله.

بالتوفيق للجميع

بحمد الله وتوفيقه، وبفضل الله ثم تصويت مستمعين البودكاست لنا، تمكّن بودكاست سعودي قيمر من الحصول على المركز الأول في جائزة هديل العالمية للاعلام الجديد في قسم التدوين الصوتي والمرئي. الاعلان عن النتائج كان الاسبوع اللي فات، لكن ما حبينا نكتب عنها الا بعد ما يكتبون النتائج في موقعهم.

قدامنا اشياء كثيره بنسويها ان شاءالله لتطوير البودكاست، وهذي الجائزة بتكون بمثابة دفعة معنويه كبيره لنا ان باننا نعطي الأفضل دائماً.

على طاري الجائزة، شخصياً ما ادري اذا فيه فعلياً “جائزة” ولا لا، بس يقولون بيرسلون لنا “تروفي” ذهبي

في هذا اليوم 9 يناير 2010 نكمل سنه من بداية بودكاست Saudi Gamer، سنه مرت والى الآن احس اننا توّنا نبدا.

فكرة البودكاست في البدايه جت من جميل في سنة 2008، كنا كمستمعين للبودكاست الاجنبيه نبي نسوي شي بالعربي عشان نغطي النقص الشديد في البودكاست العربي عموما و في بودكاست الالعاب خصوصا، وكنا متفقين نسويها تحت مظلة موقع ثاني، لكن ادارة هذاك الموقع ما ناسبته اول حلقه سويناها واضطرينا نلغي الموضوع بالكامل لاختلاف التوجّه و الاسلوب بيننا وبين ادارة الموقع.

بعدها بكم شهر اتفقت مع جميل نرجع للفكره في موقع مستقل وكلمت فيصل ينضم معنا (تشوف بالصورة شخاميطي يوم كنت احاول اجيب فكرة الشعار)، وبدينا الموضوع بحلقه تجريبيه نشرناها عن طريق قسم البلايستيشن 3 في منتدى البوابة الرقمية، و الحمدلله لاقت استحسان مع انه كان فيه كثير من الملاحظات خاصة على الاسلوب العفوي (الظاهر ما تعودوا عليه) و مدة الحلقات اللي اعتبروها طويله، وحتى انقال لنا كثير ان البودكاست مصيره الفشل بسبب طول مدة الحلقات.

لكن الحمدلله بالعمل الجماعي وبدعم وملاحظات واقتراحات المستمعين (بعد توفيق الله طبعا) قدرنا نسوي اكثر من اللي كنا متوقعينه. وهذي بعض الاحصائيات اللي توضّح النمو بالموقع والبودكاست بمقارنة يناير 2009 بشهر ديسمبر 2009:

• عدد الزيارات المميزة (او الغير متكرره) كان 1260 شهرياً، و في نهاية السنة صار (كمتوسّط) أكثر من 4000 زيارة.
• متوسّط عدد التعليقات على كل حلقة كان ببداية السنة تقريبا 15-20 تعليق، الآن يوصل الى 50 تعليق كمتوسّط.
• متوسّط عدد الاستماعات للحلقات كان في البداية من 300-400 استماع كل اسبوع، الآن أكثر من 1300 استماع للحلقة

ممكن البعض يقول العدد متواضع، لكن بالنسبة لفكره جديده نسبياً (بودكاست) العدد ممتاز الحمدلله، وخاصة اننا ما سوينا اي نوع من أنواع الدعاية للموقع.

لكن طبعاً كان خلال السنه في مواقع بارزه ما قصّرت في دعمها لنا بسماحها اننا نكتب عن الحلقات هناك، وهي تستحق كل الشكر صراحه وهي:

• منتدى البلايستيشن 3 في منتدى ADSLgate التقني (من مشرفين واعضاء)
• موقع NG4A الإخباري (من ادارة و محررين)
• موقع عالم التقنية الإخباري (من ادارة الموقع)

وأكيد بجهود الشباب (جميل اللي أسس الموقع معي وطوّر البودكاست بشكل كبير، وفيصل اللي ساعد كثير بافكاره ومبادراته)، وما ننسى ملاحظات واقتراحات المستمعين اللي ناخذها بعين الاعتبار دايم، وساعدت في تطوير البودكاست والموقع بشكل عام.

الحين نتكلم عن مستقبل سعودي قيمر…

هل بنسوي نفس اللي سويناه السنه الماضيه في هذي السنه؟ أشك بهالشي. عندنا أفكار كثيره جديدة وحلوه نبي نطبقها في الموقع وفي البودكاست، بالاضافة الى تطوير جودة البودكاست ككل، وان شاءالله انها بتعجبك كمستمع وزائر للموقع.

اذا كان عندك اي شي تبي تشاركنا فيه، او حاب تسأل عن البودكاست او فريق العمل بشكل عام، فلا تتردد بكتابته في التعليقات!

التقييم مبني على درجة الاستمتاع باللعبه في وقت التقييم مو جودة اللعبه ككل، يعني الالعاب الجديدة عادة بتاخذ ترتيب أعلى من الألعاب القديمة حتى لو كانت الالعاب القديمه أفضل.

ألعابنا المفضّلة لهذا الشهر (بالترتيب) هي:

1. Modern Warfare 2
2. Demon’s Souls – PS3
3. Silent Hill: Shattered Memories – Wii
4. The Legend of Zelda: Spirit Tracks – NDS
5. New Super Mario Bros. – Wii

بالنسبة لتقييمنا لأفضل ألعاب لسنة 2009، فراح نكتبها ان شاءالله خلال الاسبوع القادم

وش كانت العابك المفضّله اللي اشتريتها و لعبتها هذا الشهر؟ شاركنا فيها بالتعليقات.

لكن ابتداء من الأسبوع القادم ان شاءالله بنبدا بتطبيق طريقة تنظيم جديدة بين أعضاء فريق سعودي قيمر بحيث ما يأثر (بقدر الامكان) غياب أي شخص على موعد نزول الحلقات.

نرجو المعذره، وموعدنا يوم الأحد القادم ان شاءالله.

بما انه العالم بيكونون مشغولين بالعيد بالعزايم و بأكل اللحم المطبوخ بـ200 طريقه ثلاث مرات يومياً، بنأجل الحلقة 43 إلى الاسبوع القادم ان شاءالله الموافق الأحد 6 ديسمبر.

نشوفكم على خير ان شاءالله

انمسح آخر كم تعليق من موضوع الحلقة 38، و اذا كنت مراسلنا خلال الفتره المذكوره، فياليت ترجع تراسلنا مره ثانيه لانه احتمال انه ايميلك ما وصلنا.

نعتذر عن الخلل.

1. أضفنا صفحة “عن فريق العمل” فيها معلومات عننا و صور لنا.
2. راسلنا جميع الأشخاص اللي تنطبق الشروط عليهم بالنسبة لموضوع المشاركة في البودكاست. اذا راسلتنا بخصوص المشاركه و ما وصلتك رساله من فيصل الى الآن، فمعناتها عدم مطابقة الشروط.
3. لقينا رسايل كثيره بمجلّد الـspam بنحاول نقرا أكبر قدر منها في الحلقه الجايه ان شاءالله، فاذا ارسلت لنا سؤال حلو و ما قريناه، فاحتمال انه ما وصلنا من الاساس.

و سلامتك

مثل ما قلنا في الحلقة 35 في البودكاست، ندوّر عن ناس جدد يشاركونا في حلقات البودكاست بشكل دائم. الحاليين فيهم الخير و البركه (انا، جميل، فيصل، سلطان)، لكن عشان يكون فيه تنويع و فائدة أكبر للمستمعين (اللي هم بالمئات كل حلقة)، نفضّل يكون فيه ناس اكثر.

هدفنا في النهاية نطلع بـ5 اشخاص مميّزين (كحد أقصى) يشاركوننا في الحلقات و يفيدون المستمعين بتجاربهم و ارائهم. و طبعا بما انه ما يقدرون يشاركون كلهم دفعه وحده (لاسباب فنيّه بالذات)، فراح يلف الدور عليهم حسب الحاجة.

مهتم؟ حلو.

اذا لقيت في نفسك الشروط التاليه:

• تكون سعودي مقيم في السعودية (عشان تقدر تشاركنا بنقاشاتنا حول الاشياء المتعلقه بالسوق السعودي).
• عمرك على الاقل 18 سنه (ما نبي يصير وضعنا شبهه، ترانا شيبان).
• منت متعصّب لأي جهاز، و لا “تكره” أي جهاز، و تهتم بأخبار جميع الأجهزه الأساسية (ما نبي ينقلب البودكاست هواش )
• تملك و تلعب بشكل دوري بجهازين من الاجهزة التاليه كحد ادنى: Xbox 360, Playstation 3, PC, Wii.
• تحب الالعاب باختلاف انواعها، و تلعب الالعاب الجديده اول بأول.
• متابع جيّد و دائم لاخبار الالعاب من مصادرها في المواقع الاجنبيه.
• عندك قدره على الالتزام بمواعيد التسجيل المسائية، و عندك مكان هادي تقدر تشاركنا في التسجيل منه.

فراسلناعلى info @ saudigamer.com بالمعلومات التاليه:

- اسمك الثنائي (الاول و العائله).
- عمرك.
- أجهزة الالعاب اللي تملكها.
- الاجهزه اللي تلعب فيها مره وحده في الاسبوع على الاقل.
- روابط ثلاثة مواقع اخبار اجنبيه تتابعها.
- أفضل 5 ألعاب لعبتها.
- سبب رغبتك في المشاركة في حلقات البودكاست.
- أي معلومات اضافيه تحب تذكرها (موقع لك، رابط ملفّك في منتدى العاب…الخ)

و بعدها:

بنراسل عدد معيّن من المرشّحين عشان نحدّد يوم ووقت معيّن لكل واحد ندردش معه شوي، ثم في النهاية نختار 5 يبدون يشاركونا في حلقات البودكاست القادمه و يفيدون و يستفيدون.

في انتظار رسايلكم!

الكود ما يشتغل الا على الحسابات الأمريكية فقط. و الديمو هو لطور الأونلاين، و ليس طور القصة.

لتحصيل الكود، ببساطة تروح لأيقونة Playstation Network ثم Account Management ثم Redeem Codes، و تدخل الكود هناك، و بيخليك تحمّل ديمو اللعبه.

ألف شكر لمستمع البودكاست دحّومي (tigerksa على البلايستيشن) لارساله الاكواد لنا.

تحديث: البعض اشتكى ان الكود اللي ارسله له ما يشتغل معه. ما اعرف ليش صراحه، خاصة اني اذا جربت الكود اللي فيه مشكله يشتغل معي بدون مشاكل. حاول تجرّب الكود بعد فتره، يمكن يظبط.

تحديث 2: تم توزيع جميع الاكواد. اللي ما وصله ردي الى الآن، فارجو انه يعذرنا، بس الطلب كان اكبر بكثير مما تصورنا. اللي ما يشتغل معه الكود يحاول فيه اكثر من مره. كل اللي اشتكوا من اكوادهم طلعت اكوادهم تشتغل عندي، فيبدو ان فيه مشكله بالموضوع.

تحديث 3: وصلنا تنبيه من أحد الاخوان ان الكود اللي حصل عليه منتشر في الانترنت. أما ان الاكواد متسرّبه من الشركه المسؤوله عن توزيع الاكواد، أو ان الأخ دحّومي (اللي ارسل لنا الاكواد) موزّع الاكواد لناس ثانيين قبل كذا. بكل الاحوال، نعتذر عن اللي صار و باذن الله ما راح يتكرر ثاني مره، و اللي امداهم يستخدمون الاكواد قبل ما تنتشر فالله يهنيهم.

من هنا الى وقت الحلقة، اللي ما يبي تفوته اخبار ممكن يقراها بموقع NG4A، و اللي يواجه مشاكل او يبي يناقش موضوع معيّن ممكن يزور قسم الالعاب في منتديات adslgate، كلها مواقع صديقة (و كبيرة) كانت تدعمنا من بدايات البودكاست.

عندنا افكار لاشياء حلوه كثيرة بنبدأ بتطبيقها تدريجيا بعد العيد ان شاءالله. فلا تنسانا

ما تعرف وش هو twitter؟ هي خدمه بسيطه جداً تستخدمها عشان تكتب مسجات خفيفه يشوفونها الناس اللي يتابعونك بالموقع، و انت تشوف مسجات الناس اللي تتابعهم. و حساب موقعنا بنستخدمه عشان نكتب عن الحلقات الجديدة لحظة نزولها أو أي جديد مرتبط بالموقع. و بتكون بعد طريقة سهله و سريعه للتواصل مع المستمعين اللي يستخدمون twitter.

فاذا عندك حساب في twitter، لا تنسى تتابع SaudiGamer!

نبّهني بعض الاخوان الى وجود مشاكل في الموقع في متصفّحهم. يبدو ان الموقع ما يظهر كامل في Internet Explorer 7 و Internet Explorer 8، و اغلب الظن المشكله موجوده في Internet Explorer 6. البعض اشتكى من وجود مشكله في زيارة الموقع عن طريق متصفّح Google Chrome، لكن ما جربته شخصيا.

اعتذر عن هذه المشكله و بشتغل عليها عشان احلها في اسرع وقت ممكن. حالياً مستخدمين Firefox ما عندهم مشكله في استخدام الموقع.

اذا واجهتك اي مشكله في الموقع يا ليت تعطيني خبر على اساس احلها لك. و اكون شاكر و مقدّر لك.

اللي عنده سؤال او اقتراح او يبي يحش فينا ياخذ راحته بالتعليقات

نشوفكم في رمضان ان شاءالله، و آسفين على التأجيل لكنها كانت اسباب مفاجئه اجبرتنا عليه، ماهو شي اختياري.

التغيير صار لسببين:

1. لان ايام السبت و الاحد بشكل عام قليله اخبار الالعاب فيها، فتصير افضل وقت نغطي فيها اخبار الاسبوع كله.
2. لان يوم الجمعه (كيوم اجازه) تصير فيه ارتباطات صعب الواحد يلغيها، و ما نبي يأثر هالشي في تأجيل او الغاء بعض حلقات البودكاست مستقبلا عشان نستمر  في تقديم الاخبار لك اسبوعيا بدون انقطاع قد ما نقدر ان شاءالله.

نبي نجرّب التغيير الآن و نشوف كيف يصير الوضع، لان الى الآن ماهو تغيير نهائي.

و طبعا رأيك في النهايه يهمنا، فيا ليت تشاركنا فيه عن طريق تعليقك على الموضوع.

من هنا الى يوم الجمعه، نتمنى لو تساعدنا بتطوير البودكاست على اساس يناسبك كمستمع اكثر بإجابتك على 8 اسئلة خفيفة في التعليقات (ما راح تاخذ اكثر من 10 دقائق من وقتك):

1. وين او كيف سمعت عن البودكاست؟
2. وش كان انطباعك اول ما دخلت موقع Saudi Gamer؟ هل كانت الفكرة واضحة او تحتاج لتوضيح؟
3. وين تستمع للحلقات عادة؟
4. وش رأيك بمدة الحلقات؟ هل برأيك الافضل تكون اطول و تحتوي اخبار و فقرات اكثر، او اقل و تكون مختصرة؟ و كم المدة المناسبة برأيك؟
5. وش اكثر شي تحبه بالبودكاست؟ ووش اكثر شي تكرهه؟
6. وش اكثر فقره تحبها بالبودكاست؟ ووش اكثر فقره تكرهها؟
7. هل في بالك فقرة تقترح نضيفها؟
8. هل واجهتك اي مشاكل في جودة الصوت او التسجيل او حجم ملفات الحلقات؟

و طبعا اذا عندك اي اضافات ثانيه تقدر تكتبها بعد الاجابة.

و مشكور مقدما

متوسّط عدد الاستماعات و التحميل لكل حلقة: 720 استماع و تحميل

متوسّط عدد الزوار شهريا: 2200 زائر مميز

اكثر زيارات من مواقع خارجيه (بالترتيب حسب عدد الزيارات):

1. منتدى ADSLgate التقني
2. موقع NG4A الإخباري
3. موقع عالم التقنية الإخباري

أكثر 5 بلدان العربية زيارة للموقع (بالترتيب حسب عدد الزيارات):

1. السعودية
2. الإمارات
3. مصر
4. الكويت
5. قطر

حقائق عشوائية:

• %84.4 من مستمعين البودكاست يستمعون لنا او يحملون حلقاتنا عن طريق المتصفّح. 14.8% مشتركين معنا عن طريق برنامج iTunes لتحميل الحلقات تلقائيا. الباقي يستخدمون برامج اخرى (مثل Zune, WinAmp…الخ)
• عدد الرسائل اللي وصلتنا من المستمعين الى الآن 100 رسالة تقريبا.
• يوجد لدينا الى الآن 285 مشترك في صفحتنا الرسمية في الـFacebook
• سجّلنا الى الآن 19.8 ساعه, ما يعادل 70 دقيقه كل اسبوع (كل حلقة).

و ماشاءالله برأيي الإحصاءات جيدة بالنسبة لموقع بودكاست عربي جديد, و لو اننا نطمح بالمزيد.

بعد مناقشة فريق العمل للموضوع, اتفقنا انه من الافضل انه يشمل البودكاست جميع الاجهزه, خاصة اننا نعشق العاب الكمبيوتر بجميع اشكالها و انواعها, و مو عشّاق جهاز واحد. و في النهاية, ما راح تلاحظون اختلاف كبير في المضمون. تقريبا اغلب اخبار الالعاب اللي نغطّيها الآن هي العاب موجوده على الـxbox 360 و الـPlaystation 3. و الاخبار المهمه على جهاز الـWii و الاجهزه الثانيه جميعا تعتبر قليله جدا مقارنة بالـXbox و الـPlaystation.

باختصار, البودكاست بيكون غير محصور على جهاز معيّن, و لكن تركيزنا اكثر شي بيكون على الـPlaystation 3 و الـXbox 360 بما انها الاجهزه الاكثر شعبيه في السعودية.

و كالعادة, ارائكم و اقتراحاتكم تهمّنا لتطوير البودكاست, فنرجو انكم تشاركوننا فيها بعد استماعكم للحلقة القادمة.

على مستوى المواقع:

• شكرا منتدى البلايستيشن 3 في موقع Adslgate.com, و اخص بالشكر مشرفين القسم جميعهم بدون استثناء. المنتدى دعمنا بمشرفينه و اعضاءه مشكورين من قبل حتى ما نبدا بتسجيل الحلقة الاولى.
• شكرا موقع ng4a.com متمثلا بالاخ nathan اللي حريص يضع كل حلقه لنا هناك.
• شكرا موقع عالم التقنية متمثلا بالاخ سعود الهواوي اللي ايضا يدعمنا بوضع كل حلقه لنا في موقعه.
• شكرا موقع 4travian.net متمثلا بالاخ ريان لوضعه دعاية دائمه بالموقع بدون مقابل.

و لو تلاحظون كلها مواقع سعودية كبيره و ماهي بحاجه لنا, لكن دعمهم لنا كان نابع من حبهم لابناء بلدهم و دعمهم لاي نشاطات جديده و طموحه, خاصة ان المؤسسات الرسميه تتجاهل المبادرة برعاية مشاريع الشباب على الانترنت مثل الدول الثانيه.

على مستوى الافراد:

• شكرا لك انت قاريء الموضوع, فمتابعتك للبودكاست و ارسال اسألتك و ملاحظاتك و اقتراحاتك هو اكبر دعم ممكن يجينا.
• شكرا صديقي عبدالله اباحسين, اوجد لي ثيم مناسب للموقع, و هالشي سرّع لي عملية اطلاق الموقع.
• شكرا للمبدع طلال الاسمري اللي اعطاني من وقته الضيق لمساعدتي في بعض الامور التسويقيه المهمه للموقع.

ما زلنا الى الآن في بدايتنا, و البودكاست اللي تشوفونه الآن ماهو شي نهائي, فهو بيكون في تطوّر مستمر باذن الله بناء على اقتراحاتكم و مخططاتنا له.

شكرا لكم جميعا

نظرا لطول القصص و كميتها ما راح ننشر غير القصة الفائزة و المرشحين.. مع العلم انه تم إزاله الحوارات الطويله.

القصة الفائزة بالمسابقة بقلم الاخ ماجد:

طبعا  الأحداث في الرياض وجده وتكون لعبه مصوره في أحياء معينه بالرياض  وجده بتفاصيل دقيقه

يكون أبطال القصة  مجموعه من الجيش (الصاعقه) مع آن أكثرهم لهم كرش وما عندك احد بس لازم نسوي هياط بالموضوع ارفع راسك انت سعودي والاعداء يكونون زومبي على شان نرضي العالم ما يقولون ارهاب وتمنع لعبتي من دخول السعوديه

الزومبي يبدا بمطعم الشورما اللي في البطحاء بعماير الراجحي  بسبب الدجاج الفاسد اللي يبيعوه البنقاليه ولا ينصاب بالمرض ويتحول زومبي الا البنقاليه في الرياض وجده السعوديين عندهم مناعه من كل شي والجيش شغلته تذبيح بالزومبي والفرقه شغلتها التحقيق في الموضوع والبحث عن مصدر المرض وما يواجهها من زومبي على حسب طور القصه بتقولي كيف انتقل المرض الى جده بقولك كيف هذا انتقل من بنقالي هج من كفيله وراح الى جده تهريب وهنا نقل المرض لهم

طبعا الزومبي مو كلهم قوتهم وحده لا على حسب وضعه قبل ما يتحول اذا حرامي كيابل هذا ضعيف اذا نصب واتحيال يكون اقوى شي واقوى زومبي موجود هو المورد لالعاب الفديو بالسعوديه البنقالي الكبير حقهم هذا اذا ذبحتها تختم اللعبه وافتحلك كل الاسلحه.

طبعا كل فترة بنزلك ملابس وأسلحه جديدة وخرائط جديدة من أحياء الرياض وجدة

المشاراكات المرشحة:

قصة مرشحة بقلم الأخ gta-lover:
القصه : منذ الف السنين كان هناك حرب في بلاد السند ((الاسم ليس واقعي )) وبعد التعذيب والحرب التي طالت سنين وايام انتصر الفريق المستعمر وهناك واحد جندي اسمه ( ماكس ) : قال(( في حوار داخلي)) لماذا نقاتل شعب وهم لم يفعلونا شيء .

فغرزت في الجندي الكرامه وعوة النفس, و في يوم اخر من الحرب وجمع الجندي ( ماكس ) اصدقائه الثلاثه ((جميل  و معروف وفيصل   )) ثم قال بصوت عالي : يــــا ايها الجنود و يـــــــــــا ايها الجنود لماذا نقاتل شعب البريء الذي  لم  يفعل لنا شيء قط ولم يقاتلنا قط ..الخ (( ما نريد اطول  عليك القصه واحرقه على الناس ))

فاقتنع الجنود الثلاثه وقالو بصوت واحد : نحنو معك (( واي شيء تريد ان تفعله قدمنا على قدمك  ))

ولاكن الجندي فيصل كان يحب المال ويكره صديقه (( مشهور )) لانه رجل اعمال وصاحب (( كاش )) فوصل الكلام الى الناس الفوق مقابل مبلغ وقدره  100 الف $  وقال لهم ماذا حدث في الاشتماع وانهم سوف يهربون …

وفجأه صدر صوت انذار على انهم هربوا من حجرهم

وبدئة المعركه الحقيقيه وصار اعز اصدقاء (( ماكس وجميل و مشهور  )) هو اشد العداوه له وهو (( فيصل )) بسبب حب المال والوصول الى عالم الشهره

وفي اخر القصه تم الفوز الاصدقاء الثلاثة بسسب العزيمه والاصرار  و حب الحق وعدم الرضا بالزل تم الانتصار على الاعداء .

وفي الاخر شي ظهر الخاين (فيصل )  وكانت المعركه معه مليئه بالحماس وعندما قارب على  موت وقفت المعركه وصار ( ماكس ) يتكلم معاه الخاين.

و قال فيصل : لا لا لا تقتلني ارجوك و اتوسل اليك .( وهو عم يبكي يعني يصيح)

قال ماكس : الخاين الصداقه ماكنه الموت

ثم قال جميل : اه يــــــــا خـــــــاين العشره

قال مشهور : من شان المال تخوننا كنت قلي الله يهديك كنت عطيتك شوي . ((ضحكه ))

ثم وجه ماكس المسدس على راسه وقال : وداعا

وتسمع صوت اطلقت النار القويه

ثم يتشكروهم الشعب ونفس اليوم يركبو الجنود الشجعان الطياره وعادو الى بلادهم معزازين مكرمين افعين وجههم

وهاكذا تنتهي القصه.

قصة مرشحة بقلم الأخ مشعل فهد:

الكوكب رقم 7

القصه
قبل كم مليون سنه كانت تعيش  كائنات حيه مسيطره على جميع الكائنات الحيه في الكون كما البشر الان على الارض الان وكانت الاكثر ذكاءا اضعاف البشر توصلت الى انتاج ماده  من البشر عبر تذويبهم تساعدهم  على اطالة حياتهم اضعاف اضعاف حياتهم الاصلية  وماكان منهم الا ان يرسلو البشر للكواكب الشبيهه بكوكبهم لتكون حظائر لانتاج البشر وكانو يملكون 37 حظيرة او كوكب  ونحن على الكوكب 7 المختلف عن باقي الحظائر ان الزمن فيه سريع جدا جدا لسبب كيميائي في الارض فلما اتو لياخذو بعض الانتاج تم استقبالهم براس نووي فجر مركبتهم لتقوم الحرب بيننا وبينهم

——
اضافات:
* في اخر الشريط تاتي لقطات كيف ارسلو البشر وكيف قضو على المخلوقات اللتي تهدد البشر في الارض مثل الديناصورات
* البشر في الكواكب الاخرى لازالو لم يكتشفون العجله حتى الان ):
*  سبب الخوف من الكائنات الفضائيه هي افكار  تم توارثها من اجدادنا الاوليين الذين تعرضوا من هذه الكائنات الحيه حتى اصبحت غريزه انسانيه

قصة المرشة بقلم الاخ عبدالعزيز الزهراني:

الشخصيات الموجوده

1- عبدالعزيز << انا &&

2- احمد << ابن عمو &&

صباح الاحد 21 / 1 : 1426 هـ

عبدالعزيز يتصل على احمد
عبدالعزيز : السلام عليكم ورحمة الله
احمد: هلااا والله عزو يالله حيه
عبدالعزيز كيفك طيب عساك بخير كيف الاهل والوالد والوالده
احمد : كلهم تمام وبشرك الا .. ترى اتصالتك تخوف ماتدق الا فيه شي مثل توقو موري مايروح مكان الا فيه جريمة قتل هههههههههههههههههههههههههه
عبدالعزيز: ههههههههههههه لا الله يرجك بس ودي نروح القرية القديمة حقت العايلة
احمد: ايش القرية !! انته منجدك !!
عبدالعزيز: ايه والله اقوله صادق
احمد: طيب ليش ويش جا على بالك !!
عبدالعزيز : والله يقولون جت امطار الفترة الاخيره هناك والعالم مصيفة بنفس المدينة انا قلت خلنا نغير ونروح قريتنا ونشوف بيوتنا القديمة وفي نفس الوقت في كم غرض من زمان ودي اشيك عليها العابي القديمة وغيره والله وحشتني
احمد: والله قدام ماعندك اي اي مشكلة بس ماودك نكلم سلطان ناخذهـ معنا ويش السيارة الي بنروح فيها ؟؟
عبدالعزيز : لا كلمت سلطان يقول مشغول لين راسة احنا بنروح وبناخذ عدة القلطة والراديو عشان مانحس بملل والسيارة بناخذ سيارة الوالد !!
احمد: ابشر خلاص متى ودك نمشي ؟؟
عبدالعزيز : الاربعاء…… الاربعاء جدا جدا مناسب
احمد : اوكي وانا بفضي نفسي خلك جاهز !!
عبدالعزيز : ابشر توصي شي وجهز نفسك لاتنسى
احمد : لا سلامتك اكيد بتجهز من الحين ان شاء الله
عبدالعزيز مع السلامة
احمد : مع السلامة
فجر  الاربعاء 25 / 1 : 1426 هـ
طبعا بعدما ماسلمو عى بعض انطلقو من مدينة جده للقرية الي تبعد زمنيا ما يقارب الثلاث ساعات عن مدينة جده بسير متواصل بعد مابقي ساعتين على الوصول دار الحوار التالي :
احمد : يوووووووه والله متشوق اروح القرية قسم بالله تتذكر زمان العصرية ايام الكورة والفله القرية كان فريق كامل هههههههههههههه
عبدالعزيز: هههههههههههههههههههه اجل والله ياشيخ ايام ليتها ترجع بس مثل ذاك اليوم الله لاجعله يعود !!
احمد: يوم !! اي يوم يبن الحلال ؟؟؟
عبدالعزيز: تتذكر الكلام هذا قبل سنوات والله ناسي متى يوم جدتي مرضت ووديناها عند شيخ !!
ياخي من ذاك اليوم والقرية مي مزبوطة تخيل المجلس القديم ……….. احمد يقاطع عبدالعزيز ياخي لايكون تقصد يوم طلع النور الابيض من المجلس وتقو انها شافت رجل كبير ورجه
عبدالعزيز : ايه ايه بس وصلت
احمد: ياخي اتذكر ذاك اليوم واحنا صغار حتى اهلنا كانو خايفين من الوضع بس مايبغو وضوحو !!
عبدالعزيز : صادق ياخي من بعد الهرجة الناس بدت تطلع من القرية وتهجرها واحد واحد ما لاحظت !!
احمد : الا صادق والله بس قعدت فترة ونيسناها
عبدالعزيز : ايه بس ما تتذكر بيت عمي عبدالله يوم تجي منه ذيك الاصوات !!
احمد : لاتذكرني ياخي والله كانت رعب صراخ مهوب صاحي !!
……………………………………………………………………….
وصل احمد وعبدالعزيز على مشارف المدينة دخول فيها اوضاع عاديه المتنزه مليان اجواء رائعة وعلى اليمين شباب يتبارون على اليسار اطفال بالحديقة والصور واللافتات الترحيبية احمد وعبدالعزيز يتوجهون للقرية اجواء تعود لتمطر بغزارة عبدالعزيز يشغل المساحات ويقف عند اقرب اشارة … ينتظر لتصبح خضراء فجأة تعطل الاشارة يضطر عبدالعزيز لتجنبها طريق اسفلتي شبه خالي تماما بل قد ينعدم من المارين عليه ..
يبدأ عبدالعزيز بالدخول للطرق الوعرة ويسير ببطئ حرصا على السيارة يدخل تلك الطرق المتداخة التي محا ملامحها الزمان ولكن ذاكرة عبدالعزيز التي كانت يوما صغيره مازالت تذكر تلك المعالم
1000 متر تفصل عبد العزيز عن دخول القري جو ماطر احمد ليس مؤدي البقاء بالقرية بهذا الوقت الممطر الساعة 2 ظهرا والشمس لاترى احمد وعبد العزيز انهكهما التعب كل واحد فرد المقعده وخذله غفوة ….. موقت جوال عبدالعزيز يشتغل بالآذان وفجآة صوت صراخ مدوي …………………………… احمد : بسم الله الرحمن الرحيم !!!!!
عبدالعزيز : لا اله الا الله ويش ذا .. تخبر حد ساكن بالقرية الي جنبنا ولا شي
احمد : لا .. اقلك هذي القرى انهجرت من 8 سنوات !!
عبدالعزيز : يارجال تعوذ من الشيطان خلنا ننزل الفرشة ونصلي الظهروالعصر نقصرها ونروح نتفق احوال القرية ..
احمد نزل الفرشة وجك موية الوضوء توضئو وصلو ونزلو اكل شروه من المدينة قبل يوصلون القرية
الساعة 5:30 المغرب احمد وعبدالعزيز يقومون يروح بيت عبدالعزيز القديم وهوه البيت الاكبر بالقرية دخل البيت طبعا اخذ المفاتيح القديمة من ابوهـ دخل البيت على الصالة حيث وضعت الاشياء القديمة فيها
يضرون لتشغيل كشافات جابوها معهم عبدالعزيز يقلب ويقلب ويقلب ويحط يدهـ على دفتر !!
يطلعهـ ويقرى مكتوب على صفحته
مذكرات تركي
<< تركي يعتبر اكبر اخوان عبدالعزيز >>
عبدالعزيز ينادي احمد الي مشغول باللعب بالالعاب القديمة ويفككها ويرميها في الجدار عشان يكسرها ويشوف من ايش مصنوعة ويردد ياخي ليش الحاجات القديمة دايما اصلية بالغصب تنكسر
احمد: هلا
عبدالعزيز : تعال تعال شوف مذكرات تركي
احمد : جايك جايك ..
احمد وعبدالعزيز يسلطون الضوء على المذكرات ويقلبون الصفحات كلها مكتوبة بالازرق وبتسلسل جميل وخط جميل تقليب سريع للصفحات وكأن عبدالعزيز يريد اعادته لانه طويل الاحداث ولكن اثناء تقليبة تستوقفه سفحه مكتوبة بالخط الاحمر
مكتوب فيها :
الخميس : 19 / 8 / 1418
اليوم اجازه بدينا اول يومنا لعبنا كورة من الساعة 8 الصبح وتوزعنا فريقين وفازو علينا بالغش بعد ما ادو صابر فلوس عشان يحكم لهم << طبعا مزح لانهم ناس متفاهمين وفله
ورحت تفرجت تلفزيون كان في السعودية الاولى برنامج الحصن كلنا قعدنا وتفرجنا عليه بس كن الارسال مشوش من الاريل لانه اليوم كان عواصف وامطار بس الشي لغريب الي حصل بالقرية ان فيه مثل الشعاع طلع من مجلسنا الاعلى القديم وجدتي شافت رجل غريب الشكل ….
يقطع عبدالعزيز القرآء يستمع لصوت قرع نعال ناس قادمين
عبدالعزيز: سلامات من بيجينا يمكن من الرعاة اليمنين الي يمرون من القرية
احمد : يمكن والله ,,
عبدالعزيز : ايه بس مامعاهم غنم انا الي سامعه صوت خف حيوان مو انسان عبدالعزز يلمح من الباب من الزاوي ظل شخص قادم مو باين الا ظل رأسة عبدالعزيز شك بالوضع بسرعة يصك الباب المتهالك بهدوء وينظر من شقب الباب رجال !! رجال يمشي
عبدالعزيز يكاد يفتح الباب احمد يمسك يد عبدالعزيز ويأشر بيده يقصد ناظر رجولة !!! عبدالعزيز وبحالة من الهلع يفقد انفاسه وهو معروف بخوفة من هذه الامور لان اقدامه كانت
اقدام بعير اكرمكم الله !!!!!!!!!
عبدالعزيز يسمع الثير من الاصوات القادمة يجري بكل ما اوتي من سرعة
يقفل الشباك ..!!
اختفت الاصوات وانتهى الرعب قليلا عبدالعزيز يفقد انفاسه احمد يسارع بمحاولة ايقاظه لانه لا يمتلك ماء في حوزته الان عبدالعزيز بصعوبة يقوم يلقط دفتر المذكرات نظرة من ثقب الباب لا احد
فجأى تتحول اللعبة لمنطور شخص اول
ويركض عبدالعزيز واحمد واللعبة في منظور الشخص الاول ومؤثرات الركض واضحه يحاول عبدالعزيز تشغيل السيارة لكندون ادنى فائده لا مكان للجوء اليه السحب تعود للتغيم مرة اخرى وينظر عبدالعزيز للشخص الذي رأوه سابقا يتشنج ولا يستيشطع الحديث مكتفيا بالاشارة لاحمد الذي يذكر عبدالعزيز بانهم لايضروه شئ فقذ يذكر الله بسرعة كبير ينز عبدالعزيز راكضا محاولا الهرب يتبعه احمد الذي يحاول تهدئته في وضع مزري تماما يسقط عبدالعزيز بفعل الاحجار وذلك الشخص يتبعهم
ويوم كلمهم قال لهم
ليش جيتو هنا ماتعرفو انكم صحيتونا وان قريتكم اخذناها منكم بعد اربعين يوم من تركتموها ….. عبدالعزيز لايصدق ماتراه عيناه في ظل تماسك احمد عبدالعزيز لا يحرك ساكنا يتقرب الرجال منهم وفجأة
الله اكبر الله اكبر.. الله اكبرالله اكبر
جوال عبدالعزيز يبدأ بالاذان والشخص الغريب يجري بطريق غريبة جدا وصوت بكاء اطفال صادر من المجلس العلوي صاحب قضية 1319 هـ
عبدالعزيز يستجمع قواه ياخذ اسيارة ياخذون ماتيسير من الاكل ويلقطون الفرش بسرعة والمذكرات وبعض الادوات والراديو !
عبدالعزيز يطلب من احمد محاولة (( نتش السيارة )) عبدالعزيز يدفعها بكل لا بل بضعف ما اوتي من قوة تعمل السيارة عبدالعزيز دخل للقعد الخلفي من الفرح والخوف معا يغلق الباب ويقل لاحمد
عبدالعزيز: اسرررررررع خل السيارة ماعليك كلهاحديد ا
احمد : هد نفسك خلاص بنحاول نمشي الآن
عبدالعزيز : يالله بسرعة بسرعة
احمد يحاول العثور على مخرج اخر فالسيول سدت المخرج الاساسي من القرية .. ,
احمد : السيول سدت الطريق……
عبدالعزيز : طيب حاول تروح من طريق الشريف القديم هذاك ماتجيه السيول ..
احمد يتوقف ينزل من السيارة يتبعه عبدالعزيز ويعاين حالة السيول المتدفقة بقوة في منقطة مقطوعه تماما عن العالم الخارجي !!
عبدالعزيز يشغل الراديو يستمع للنشرة الجوية المصحوبة بكثير من التشويش حيث يقول مذيع النشرة بان الامطار على المنطقة الجنوبية قد تستمر يومين على الاقل !!
عبدالعزيز : ينادي احمد ويخبره بالامر ..
احمد لايجد الا طريق الشريف للخروج من هذا الكابوس المخيف في هذا الطريق يدور الحوار التالي :
احمد: لا ابشرك مهو مقفول بس في مشكلة ..!
عبدالعزيز : ايش هي خلاص والله انا نفسيتي تعبت ابغى امشي البيت والله ماعاد اجي القرية هذي !!!!!!!
احمد : هي مي بحد ذاتها مشكلة بس بنمر بقرية وعرة وكبيرة يعني ممكن الجن ترمينا بالحجار او ممكن تسوي اي شي فينا وانا والله خايف
عبدالعزيز : ياخي مافي الا حلين يا اننا نطلع قبل آذان العشاء او والله لنروح فيها !!
احمد: توكلنا على الله ,,.
احمد ماشي والقرية هادئة تماما ولكن فجأة احمد يلمح مواشي كثيرة اغنام وغيرها ..
احمد: عبدالعزيز شوف غنم اكيد فيها راعي يقلنا عن احوال الطريق
عبدالعزيز : انت صاحي ول مجنون والله يجيك مثل الي طلع لنا بالقرية يا مجنون..
احمد: اجل ويش تبينا نسوي
عبدالعزيز : يفكر قليلا .. احمد طيب شوف خل السيارة شغالة واذا شفنا شي ادعس
احمد: وهذي يبغالها كلام ..
احمد ظيرب بوري .. ويظرب لين يجيهم راعي اشتبه عليهم انه يمني
احمد : السلام عليكم
الراعي : وعليكم السلام ورحمة الله وبركااته هلا .. الراعي ماينتظر احمد يكمل كلامة ويقول .. اي جابك هنا انتم ماتعرفون ان المنطقة فيها جن ,,. عبدالعزيز واحمد يتنفسون الصعداء بعدما تأكدو من الوضع فسألوه من وين جاي ولي انته هنا دام الوضع فيه جن قال انا جاي من المدينة وماعندي اقامة واليوم في جوازات وتفتيش وبنجي انا واصحابي من الرعاه وبنقعد هنا حتى تروح الجوازات
الساعة 7 المغرب
ينزل احمد وعبدالعزيز يصلون المغرب مع الراعي
ويسألونة عن احوال الطريق فقال لهم لا الطريق تمام بس لو يسير الي يسير لاتلتفتون لاحد ولاتنزلون من السيارة
احمد وعبدالعزيز بدون تركيز والاوضاع متشتته : ابشر اي خدمة ؟
الراعي : سلامتكم
عبدالعزيز يعيد تشغيل الراديو بعد هدوء اوضاع الطقس ويستمع للاخبار وتاتي النشرة وبنفس الخبر ان الامطار ستستمر ليومين في منطقة الجنوب
عبدالعزيز يطفي الراديو ويحطه بجيبة …
انطلق احمد وعبدالعزيز مركزين على كلام الراعي لا تلتفتون ولا توقفون لاكن في اثناء السير يقع ضوء السيارة على فرش !!
احمد يوقف السيارة وينظر
احمد: عزو ياخي شوف الفرش ذا باين عليه جديد وتو احد قع عليه تعال نشوف يمكن نحصل احد
عبدالعزيز : اقول تبغى تنزل انزل لحالك ماني نازل معك كفاية مصايب
احمد : طيب اقعد ياخواف …
عبدالعزيز ينادي احمد خلاص خلاص بمشي معك بس بسرعة ..,
احمد : ابشر بس انزل وخلصني ..
احمد يقترب من الفرشة ويرمي السلام ويشغلون المصابيح بقايا اكل عبدالعزيز يفتش بالمصباح تقع عينه على ثوب شخص ينظر عبدالعزيز
عبدالعزيز : يا اخ ..!
ينظر هذا الشخص الاصلع لعبد العزيز ويقله ويتمتم بكلام غريب يرنظر احمد يقف بجنب عبدالعزيز وكان الصوت غريب كصوت (( الهيلقاست بكيلزون 2 ))
يجري عبدالعزيز واحمد لنحاية السيارة يعثر مرة اخرى عبدالعزيز ويلحق به الرجل عبدالعزيز لا يجد في جيبة سوى الراديو يشغل ويضع على اذاعة القرآن الكريم
ينفر هذا الرجال منه ويركض بعيدا عبدالعزيز واحمد يكملان الطريق فجأة
عودة بصيص الامل انه الطيق الاسفلتي المؤدي للمدينة بسرعة كبيرة عوده للمدينة في اجواء غريبة الكهرباء منطفئة تماما هنا واثناء اللعبة سيواجهون ثلاث الغاز لحلها لعمل الكهرباء وبذلك عودة مصالح الناس وتحذيرهم من المشكلة
كل البيوت في المدينة يمكن الدخول اليها يمكن قيادة السيارة والتجول بعالم حر تماما
بعد حل الالغاز وتحذير المدينة يعود عبدالعزيز واحمد لجده ولكن يتكتمون عن القصه بكشل تام تماما بل ويخططون لعوده جديدة ولكن …………
كل ذالك في
iN viLLaGe 2

اللي سمعوا الحلقة التاسعه بيسمعون بنهايتها انه عندنا مسابقه بمناسبة اتمامنا 10 حلقات (اذا الله احيانا). تكلمنا فيها عالسريع بالحلقه (صراحه ما فكرنا بتفاصيلها الا بالحلقة), فحبيت اكتب جميع التفاصيل هنا للايضاح:

كيفية الاشتراك:

اكتب قصة مختصره (فقرتين الى ثلاث فقرات مثلا) للعبه تبي تسويها. و اكتب الحوار اللي يدور بين الشخصيات في بداية هذي اللعبه. و سواء تبي تستهبل او تبي تكتب شي جدّي ترا ما عندنا مشكله.

ارسل القصه مع الحوار في ايميل على بريد البرنامج info@saudigamer.com.

آخر موعد لارسال القصص:

مساء يوم الخميس القادم الموافق 12 مارس 2009.

كيفية اختيار الفائز:

بنفرز القصص و نختار كم وحده و نقرأها و نقيمّها خلال الحلقه العاشرة. القصه اللي تحصل على اعلى درجه بتفوز بالجائزه. مافيه معيار محدد للتقييم.

جائزة المسابقة:

الفائز الاول بيحصل على:

• الكيبورد الخاص بيد تحكم البلايستيشن 3 (صورة الكيبورد), بدون اليد طبعا.
• المشاركه معنا في تسجيل الحلقه رقم 11.
• بوسه اخويه من جميل (مو اكيد, بس بحاول).

كان ودّنا نحط جوائز اكبر من كذا, لكن الميزانية محدوده جدا مثل ما تشوفون, فحبينا نحط اللي نقدر عليه D:

طريقة تسليم الجائزه:

غالبا عن طريق احد شركات الشحن للفائز داخل السعوديه. بالنسبة لاخواننا المستمعين من دول الخليج: ما اعتقد للاسف اننا بنقدر نشحن الجائزه الى خارج السعودية. لكن ممكن للفائز اذا كان من خارج المملكه انه يشارك معنا على الاقل اذا حب.

و اذا عندكم اي استفسارات بخصوص المسابقة, حنا حاضرين.

بالتوفيق للجميع

و ابتداء من الحلقة القادمة باذن الله بحاول اخفّض حجم ملفات الحلقات الى النصف, و بكذا يصير الاشتراك في البرنامج و تنزيل حلقاته اسهل و اسرع من السابق.

حبيت بس الخّص آخر اخبار و تطورات البودكاست و الموقع ككل للجميع:

1. Facebook: بدأنا قبل يومين صفحة خاصة للبودكاست في الـfacebook . نرجو من اللي عندهم حسابات بموقع الـfacebook ينضمون لنا هناك عشان توصلهم تحديثات البرنامج و اخباره اول باول, او مناقشة الاقتراحات او الملاحظات الخاصه بالبرنامج.
2. تنبيهات البريد الالكتروني (تحت التجربه): اضفنا خيار اشتراك جديد على اليسار, اللي هو الاشتراك بالتنبيهات البريدية. ادخل بريدك الالكتروني بالفراغ, ثم اضغط “اشتراك” و بتطلع لك صفحة تدخل فيها الحروف اللي تطلع قدامك للتحقق, و بعدها بتجيك رسالة تفعيل بريدك الالكتروني. بعد كذا بتصير اي حلقة او خبر ينزل في الموقع, يوصلك التنبيه على بريدك بنفس اليوم.
3. iTunes: غيرت عناوين الاشتراك في البرنامج بسبب وجود بعض المشاكل في التحميل باستخدام برنامج iTunes. يبدو انها تصلّحت المشاكل الآن, و ما يحتاج تغير اي شي باعدادات iTunes اذا كنت تستخدمه. بس اللي يواجه اي مشاكل عموما يا ليت يبلّغني عشان اتدارك الموضوع باسرع وقت.
4. تصغير حجم الحلقات: ابتداء من الحلقة السادسة باذن الله, بحاول انزّل حجم الحلقه الى تحت 40 ميجا عشان تسّرع عليكم التحميل. سويتها هالاسبوع, بس شكلي خرّبت شي بالغلط و ما ظبطت معي. بشوف وش المشكله و احاول احلها للحلقات القادمه.
5. ازالة مصادر الحلقات: مثل ما ذكرنا بالبودكاست, ما راح نقدر نحط روابط كل الاخبار اللي نذكرها بالبودكاست بسبب ضيق الوقت, بنكتفي بس بالروابط المهمه زي الصور او المقاطع او الباتشات…الخ. الاشياء اللي يحتاج الواحد يشوفها (زي اي بودكاست ثاني يعني).

فيه اشياء كثيييييييييير مخططينها للبودكاست و هي بتفيدكم بالدرجة الاولى. بس مثل ما تشوفون حاليا جالسين نواجه بعض المشاكل الفنيه, و مجرد ما نحلها نهائيا بتشوفون تطورات اكثر و اكبر. كثير من هالتطورات بيكون من اقتراحات و ملاحظات كثيره اخذناها منكم, فيعطيكم الف عافيه.

فكرة الشعار انه يجمع بين اساس العاب الكمبيوتر (جرافيكس 8-bit) و اصولنا السعودية بنفس الوقت, و ما يكون لا هو اللي جدّي بزياده ولا كرتوني بزياده على اساس يناسب جميع اللاعبين من مختلف الاذواق و الفئات العمريه.

وش رايكم؟

اشكر الاخ Menelik Seth لابلاغه عن هذا الخطأ