معرض يوم اللاعبين هو معرض سنوي يقام في الرياض بتنظيم وكيل سوني، يعرض فيه عدد من أحدث الألعاب، بعضها يكون ما نزل للسوق حتى.
المعرض هذي السنه يبدو انه بيكون أكبر وأفضل من أي سنه قبلها بما انه صار فيه عدة شركات مشاركه (مو بس سوني)، وأيضاً تم تغيير المكان الى مكان أفضل وأكبر (أخيراً!!).
ننصحك تلحق وتسجّل بسرعه عشان تقدر تحضر أول يوم بما ان اول يوم بيكون الحضور محدود وبتكون فرصتك لتجربة أكبر عدد من الالعاب أكبر. اليومين اللي بعدها بتكون للجميع، بس عاد الله يعينك على الزحمه.
الى الآن ما عندنا القائمة النهائية للالعاب اللي بتكون بالمعرض، لكن من اللي سمعناه يبدو ان بتكون فيه عدة ألعاب قويه.
نتكلم في هذي الحلقة الخاصه عن انطباعنا الاولي لكثير من العاب معرض Gamescom 2011 بعد تجربتنا لها مثل Modern Warfare 3, Battlefield 3, Batman Arkham City, Mass Effect 3 وغيرها!
بعض الالعاب الموجوده في المعرض احبطتنا، وبعضها كان افضل بكثير مما نتوقع، وبعضها كانت رهيبه لكن للأسف مالها شعبيه، بتتعرف على هذي الالعاب بالحلقة.
وصل سعودي اسمه عبداللطيف الى نهائي أكبر بطولة عالميه في لعبة ستريت فايتر، تغلب فيها بالدور النصف النهائي على دياجو، وهو لاعب كان يعتبره الكثيرين اسطوره في ستريت فايتر بسبب انجازاته السابقه في بطولات ستريت فايتر، بالاضافة الى عدة لاعبين محضرمين ثانيين مسح فيهم البلاط باللعبه (غثونا هالآسيويين جيدين بكل شي، يبي لهم من يهجدهم).
هذي صورة ولدنا بالاضافة الى فيديو مباراته الحماسيه مع دياجو (عبداللطيف يلعب بشخصية C. Viper):
انضم محمد الشريف مؤخراً الى فريق العمل الموقع. اصبح الآن العضو الخامس في فريق عمل الموقع والبودكاست.
يمكن تتسائل “طيب هو ما كان معكم من زمان؟”. هو فعلياً يشارك معنا من زمان في البودكاست، لكن الشباب في فريق العمل يسوون اشياء اضافية فوق الحضور والتسجيل في الحلقات. والاشياء اللي قدمها لنا محمد اكثر بكثير من حضوره ومشاركته معلوماته وتجاربه الثريه في حلقات البودكاست بشكل مستمر، وعنده مبادرات رائعه ساهمت في تطوير البودكاست بشكل مميز.
فاتمنى انك تساهم معنا بالترحيب فيه وتشجيعه لتقديم الافضل.
تابعنا كلنا اليومين اللي فاتوا مؤتمرات الشركات في E3. الى ما ننتهي من تجربة المعرض بالكامل ثم تحليله بالبودكاست، راح اشارككم بخلاصة سريعه عن المؤتمرات اللي حضرناها:
أقوى المفاجآت:
الاعلان عن لعبة Halo 4.
تلفزيون بلايستيشن جديد حجم 24 بوصه بتقنية الـ3D بسعر يقارب 1850 ريال تشمل نظارتين ونسخه من لعبة Resistance 3 وكيبل HDMI!
تقنية الثري دي اللي تسمح للاعبين يلعبون في نفس التلفزيون وكل واحد فيهم يشوف شاشه مختلفه عن الثاني.
الاعلان عن اسم NGP الرسمي (Playstation Vita) وسعره اللي كان ارخص مما توقعناه. سعره بيكون تقريبا 950 ريال لنسخة الواي فاي، و 1130 ريال تقريبا لنسخة الثري جي.
يد تحكّم Wii U. مع انها كانت تقريباً مسرّبه من فتره، الا ان الطرق المقترحه لاستخدام الجهاز كانت مفاجئه رائعه. (فيديو)
هالسنه ان شاءالله راح نغطي معرض E3 – أكبر معرض لالعاب الكمبيوتر – من أرض الحدث ان شاءالله.
ولكن! ما راح نطفّشكم بكم كبير من التقارير والاخبار المملة. نبي نروح نجيب المعلومات اللي فعلاً تهمّك كمتابع لموقعنا. طبعاً راح تكون فيه تغطية عامه للمعرض، لكن اللي يهمّنا أكثر اننا نجيب لك الاجابات اللي تبيها “أنت”.
فاللي راح نسويه هو التالي: اسألنا اي شي تبي تعرفه موجود في المعرض (سواء كان عن لعبه او غيره) ونبي نبذل كل جهودنا في اننا نجيب لك الاجابه وبالفيديو بعد ان امكن بعد. تبي نشيّك لك على ميزه اذا هي موجوده في لعبه تنتظرها؟ تبي نحاول نسأل مطوّر لعبه معينه سؤال في بالك؟ …الخ
الاسئلة بامكانك ترسلها على بريدنا المخصّص للحدث e3 @ saudigamer . com أو تكتبها في التعليقات في هذا الموضوع.
واذا ما كنت تعرف الالعاب الموجودة في المعرض، فبامكانك الاطلاع على قائمة الألعاب في IGN.
تحديث:اعتقد جانا عدد كافي من الاسئلة، راح نكتفي بهذا القدر عشان نبدا بالاعداد للرد عليها جميعاً ان شاءالله. شكراً لكل من شارك
وصلنا بيان صحفي من شركة EA يذكر ان اللعبه القادمه من سلسلة Fifa 12 بيكون فيها قوائم وتعليق باللغه العربية (مع المعلقين عصام الشوالي وعبدالله الحربي) – شي ننتظره من زمان صراحه بغض النظر اذا تحب المعلقين هذولي أو لا.
اعتقد الشي هذا راح يجذب باقي محبي Pro Evolution Soccer الى سلسلة فيفا، ولا وش رايك؟
مليت من المناسبات الرسميه الخاصه بالالعاب؟ اجل خلينا نشوفك يوم الخميس الموافق 19 مايو في قاعة الملك فيصل الخيريه في الرياض. انا وأحمد الأحمري من البودكاست بنكون احد المتحدّثين في عدد من جلسات نقاش مع شباب ثانيين، بتدور الجلسات حول عدة مواضيع تهمنا كلاعبين جيمز عموما، ولاعبين جيمز سعوديين خصوصاً. تقدر تتخيله كانه حلقة بودكاست، لكن امام جمهور، مع وجود بعض الالعاب اللي ما نزلت للتجربه قبل ما تبدا جلسات النقاش.
بالمناسبه، الموضوع ماهو رسمي ابداً، فما راح نشترط عليك تلبس لبس معين او نجبرك تستمع لكلام تسويقي ممل.
سجّل الآن لان المقاعد محدوده. المزيد من التفاصيل في موقع جمعة الجيمرز.
انضم محمد الشريف مؤخراً الى فريق العمل الموقع. اصبح الآن العضو الخامس في فريق عمل الموقع والبودكاست.
