بالنسبة للنتائج: المسابقة كان فيها مشاركات كثيرة حلوه، فمهما كانت اختياراتك بالنسبه لأفضل 3 بتحس نفسك ظلمت مشاركين آخرين، عشان كذا رجعنا لسوني وطلبنا زيادة الجوائز عشان على الأقل نكافيء أكبر قدر ممكن من المشاركين. ممكن البعض يختلف معنا في الرسومات اللي اخترناها، لكن بالنهايه مستحيل يتفق الجميع على “أفضل 3″، ولو كان الفوز بالتصويت كان برأيي بيصير ظلم بسبب التلاعب في التصويت عادة.

قضينا تقريبا 3 ساعات في التقييم مرّينا فيها على أكثر من 40 مشاركة ناقشناها وحده وحده قبل وبعد تقييمها عشان نتأكد من سلامة التقييم، فالموضوع ما كان ارتجالي او شي زي كذا.

بالنسبة للتحيّز: البعض اعتقد ان الموضوع فيه تحيّز لان ما فازت ولا بنت، لكن وش مصلحة اننا نفوّز الأولاد بس أساساً؟ ما أشوف فيه أي فائده صراحه. واحد من أعضاء الفريق اقترح – بعد ما اخترنا الفائزين – اننا نفوّز بنت وحده على الأقل عشان نتجنّب هالنوع من المشاكل، لكن بالنهايه ما اعتقدنا انه من المناسب اننا نحرم شخص فائز حسب تقييمنا لمجرد محاولة ارضاء البعض اللي ممكن يفهمون الموضوع غلط. شخصياً أعجبت جداً بمشاركات البنات في قسم المحترفين، لكن فيه ناس ثانيين يقيمون معي وما اقدر افرض رأيي على احد.

بالنسبة لادارة المسابقة عموماً: للأسف البعض يعتقد اننا متفرّغين تماماً للموقع عشان ندقق في جميع التفاصيل. جميع اعضاء سعودي قيمر يعملون في وظائف وبعضهم متزوج وعنده مسؤوليات عائليه، جميع الجهود المبذوله في الموقع نسويها في الأوقات الاضافيه اللي نقدر نوفّرها من يومنا لدعمه، فشيء متوقع انه تصير اخطاء أو مشاكل، لكن نحاول قد ما نقدر اننا نصلّح هالاخطاء قد اللي نقدر عليه، ونحاول نتفاداها مستقبلاً.

شكراً لكل من أحسن الظن ومن اعطى ملاحظاته أو تشجيعه، وان شاءالله بنستمر دائما في اننا نسوي كل اللي نقدر عليه لتقديم الأفضل لكم.

أخوكم،
مشهور

جا وقت اعلان نتائج المسابقة الصيفيه! بامكانك اطلاع على جميع الرسومات في الموضوع السابق.

بداية حاب أوضّح طريقة التقييم اللي اعتمدناها.

• قسم المحترفين: كل صورة تتقيّم من 10. 5 درجات لجودة الرسم و 5 درجات لفكرة الرسمة.
• قسم الهواة: كل صورة تتقيّم من 10. 3 درجات لجودة الرسم و 7 درجات لفكرة الرسمة.

كل شخص فينا (4 أشخاص) قيّم كل صوره بتقييم مستقل عن الآخر، مع العلم ان الصور المستخدمه في التقييم كانت بدون اسماء عشان نتجنّب أي نوع من أنواع التحيّز عند التقييم. بالنهايه ناخذ درجاتنا كلها والمتوسّط حقها يصير الدرجة النهائية للمشاركة.

بالنهاية طلعت النتائج غير متوقعه نهائياً!

بالنسبة للفائزين:

المركز الأول/ قسم المحترفين: حسن. مبروك الفوز بجهاز PSPgo!

المركز الثاني/ قسم المحترفين: عبدالسلام الشمري. مبروك الفوز ب بطاقة PSN بقيمة 100$ (375 ريال)

المركز الثالث/قسم المحترفين: حمدوش. مبروك الفوز ببطاقة PSN بقيمة 40$ (150 ريال)!

المركز الأول/ قسم الهواة: وحيد نجد العتيبي. مبروك الفوز بجهاز PSPgo!

المركز الثاني/ قسم الهواة: عبدالعزيز. مبروك الفوز ببطاقة PSN بقيمة 50$ (187 ريال)!

المركز الثالث/ قسم الهواة: Dark Death. مبروك الفوز ببطاقة PSN بقيمة 20$ (75 ريال)!

راح نتواصل مع الفائزين ان شاءالله خلال اليومين هذي عشان نرسل لهم جوائزهم.

ألف شكر لجميع من شارك، و المسابقات الجايه أكثر ان شاءالله.

بامكانك تصفّح الرسومات من حسابنا في Flickr أو في هذا الموضوع. الرسومات الفائزة بتكون في موضوع مستقل يتبع هذا الموضوع.

اضغط على أي صوره لعرضها بحجمها الأصلي.

رسومات قسم المحترفين

ريما محمد هاشم نواوي
شخصيات فاينل فانتسي (من الالعاب الحصرية على اجهزة سوني) وليتل بيق بلانيت.

Takelh Dark
افا يا كريتوس، وانا على بالي شخصيتك قويه، اخرتها قهوجي؟

حمدوش
سعودي قيمر مع الهيلقاست من لعبة كيل زون 2.

عبدالرحمن علي
Jak مع سعودي قيمر.

عبدالسلام الشمري
ينفع بوستر مسلسل بدوي.

Tiger Alwabel
كريتوس رايح مع سعودي قيمر يطعسّون بالهايلكس.

رانيا النعماني
مدري هي عرضه أو رقص خليجي، المهم انه ودنا نشوف شي زي كذا في ليتل بيق بلانيت 2

Vivi Cloe
سعودي قيمر يعزف مع umjammer lammy

حنان النعماني
سعودي قيمر يعلم “زاك” علوم الرجال

حسن
سعودي قيمر وواحد من الهيلقاست يتقهوون.

فاتن بنتن

فارس المطيري

رسومات قسم الهواة

محمد السماري
سعودي قيمر و نيثن دريك يتعشون سوا. (ملاحظه: دريك يشبه الشخصيات اللي كنا نشوفها بكتاب القراءة ولا يتهيأ لنا؟)

مساعد البشري
ليتل سعودي بلانيت

نواف الجدعاني
بقاله للعائلات؟ فال الله ولا فالك

تميم القايدي
رسمه مصممه باسلوب الستيكرز في ليتل بيق بلانيت.

حسن الفردان
يتغزلون ببعض ولا يتهيأ لنا؟

Talooon
كريتوس…. قهوجي مره ثانيه؟؟!! وش فيهم العالم مستخفين فيه؟

حسن بو محمد
سنيك يتصدق على كريتوس وواحد صايدهم بالفيديو.

عبدالعزيز الرشيد
سنيك يعاني بعد ما سحب عليه كوجيما

نواف
كريتوس ناشب لشخصية سعودي قيمر

عبدالعزيز
كريتوس ودريك وسعودي قيمر وشكلهم مع هالكروش متقاعدين او شي.

الكنعاني
تخيلت نفسي ألبس ثوب بدون شماغ وأقفّل الياقه اذا جيت اسجّل. ما يجي أبد.

حاتم الخثلان
هالرسمه بالذات يبي لنا نرسلها لمطوّر ليتل بيق بلانيت لعل وعسى يسوونها في الجزء الثاني

أسير المحبه
سعودي قيمر على وشك يشوت بلنتي والجمهور يحارشون الحارس.

حسن حسان
شكله رزّه هالساك بوي

منجا منجا
شخصية ديمونز سولز (Demon’s Souls) مع سعودي قيمر.

احساس
زواج سعودي قيمر على سعودي قيمره. كريتوس هنا مطرب لان مثل ما نعرف صوته جدا ينفع كمطرب

سوسو سوسو
كريتوس مع سعودي قيمر.

مهند الربيعه
انتداب ساك بوي للرياض. ما الومه والله.

حمود المناعي
واحد من الأشخاص القليلين اللي ما ودك تزعلهم ابد اذا لعبت معهم.

أسامه الأنصاري
سعودي قيمر يسوي شي مع ساك بوي اللي جالس يسوي شي مع سنيك.

Dark Death
نيثن دريك (من انتشارتد 2) و زوجته ناريكو (من هيفنلي سورد) رايحين يشترون لعبه لولدهم سعودي قيمر من البلايستيشن ستور.

دحوم الدحمي
سعودي قيمر مركّب Cole حق انفيمس رايح يفحّط فيه. الظاهر عشان يضمن ماحد يوقفه.

وحيد نجد العتيبي
ساك بويز يصيدون ضبان. مين راح يسوي هالمرحله في ليتل بيق بلانيت 2؟

يوسف العنزي
أعتقد انضمام كريتوس للهيئة بينهي موضوع المغازلات في يومين ونص بالكثير.

رامي
سولد سنيك مع نيثن دريك في مضارب البادية.

يزيد الصقيه
ساك بوي يهوجس بالجنسيه (او شي زي كذا)

مصطفى الجيداني
ساك بوي يطلب شي ما ادري وش هو صراحه من سعودي قيمر.

خالد مخالف
جاك و راتيشت محارشين بعض وسعودي قيمر حاشر نفسه بالنص يتفرج.

أبو ركبه الغامدي
لو كريتوس يراقب كان تلقى نص طلاب الفصل متقطّعين في الفصل.

عبدالرحمن البطاطي

هشام المغيره

بعد ما بدينا المسابقة الصيفية الثانية الاربعاء اللي فات، وصلنا في خلال عدة ايام أكثر من 15 مشاركة كثير منها متعوب عليها صراحه. فتقديراً للجهود المبذولة من المشاركين في المسابقة، وافق وكيل سوني السعودية على طلبنا بزيادة الجوائز، وصراحة كانوا جدا كريمين.

الآن أصبحت جوائز المسابقة عندنا اثنين PSP Go و بطاقات PSN بقيمة 210$ (788 ريال)! فالآن بدال ما يصير فيه فائز واحد بيصير فيه 6 فائزين! (مدري ليش حسيت نفسي فيصل العيسى وانا اكتب هالسطر)

الآن توزيع الجوائز بيكون كالتالي:

جوائز الرسّامين المحترفين:

الرسّامين المحترفين أو الموهوبين بيكون لهم جوائز مستقله (عشان نعدل بين المشاركين) كالتالي:

• الجائزة الأولى: PSP Go (يجي معه 10 ألعاب كاملة حسب عرض سوني)
• الجائزة الثانية: بطاقة PSN بقيمة 100$ (375 ريال)
• الجائزة الثالثة: بطاقة PSN بقيمة 40$ (150 ريال)

اختيار الفائزين بيكون عن طريق فريق سعودي قيمر بناء على فكرة الرسمة + جمال الرسم.

جوائز الرسّامين الهواة:

الرسّامين الهواة (او اللي يمشون حالهم في الرسم) لهم جوائز مستقلة أيضاً وهي:

• الجائزة الأولى: PSP Go (يجي معه 10 ألعاب كاملة حسب عرض سوني)
• الجائزة الثانية: بطاقة PSN بقيمة 50$ (187 ريال)
• الجائزة الثالثة: بطاقة PSN بقيمة 20$ (75 ريال)

بس الفرق هنا ان اختيار الفائزين بيكون مركّز على فكرة الرسمه أكثر من جمال الرسم نفسه، مع الاخذ بالاعتبار طبعاً جمال الرسم بشكل بسيط.

ولا تنسى، المسابقة تنتهي يوم الاربعاء 14 يوليو!

اذا هذي اول مره تقرا عن المسابقة، فبامكانك قراءة تفاصليها كاملة في موضوعها الاصلي.

بالتوفيق للجميع

تحديث 2: تمت اضافة المزيد من الجوائز للمسابقة!

تحديث 3: انتهت الفترة المحددة لاستلام المشاركات. شكرا لكل من شارك! بنعرض جميع المشاركات بالاضافه الى اسامي الفائزين خلال ايام ان شاءالله.

بالصيف بتكثر طلعاتك أو يمكن حتى تسافر، وبالتالي زي أي “قيمر” مخضرم لازم يكون معك جهاز زي الـPSP Go يشفي غليلك وانت بعيد عن السوني أو الاكس بوكس حقك اللي بالبيت. أو يمكن تكون واحد عادي يبي بس شي يسلّيه وهو برا البيت، خاصّة انه معاه 10 ألعاب كامله مجاناً!

مثل ما وعدنا سابقاً، هذي هي المسابقة اللي بنعطي فيها PSP Go اثنين PSP Go مقدّمين من شركة سوني بالاضافة لبطاقات شراء من متجر PSN. تفاصيل المسابقة كما يلي:

كيفية المشاركة:

ارسم رسمه “تسعود” (يعني تخليه سعودي) فيها واحد من الشخصيات الحصرية لجهاز سوني بلايستيشن، وترسم معها خوينا المتلطّم اللي بالشعار بالشكل اللي تشوفه مناسب:

تقدر مثلا تخليهم يتقهوون سوا، يفحّطون سوا… اللي هو، اهم شي يكونون مع بعض في صورة تحسسك انهم اخويا سعوديين. ومو شرط ترسم شخصية سعودي قيمر بالضبط زي ماهي، اهم شي يكون واحد متلطم.

هل تحتاج تكون رسّام عشان تشارك؟ ابداً، حاول باللي يطلع معك، لأن بالنهاية فكرة الرسمة لا تقل اهمّية عن احترافيتها. فيمكن رسمة فكرتها رهيبه مره تفوز على رسمه فكرتها عادية مرسومه باحترافيه.

اذا ما تعرف وش اسامي الشخصيات الحصريه لجهاز سوني، فهذي صور بعضها من Google:

• Nathan Drake
• Helghast
• Jak and Daxter
• Nathan Hale
• Sackboy
• Kratos
• Ratchet and Clank

طبعا أكيد فيه غيرهم.

ملاحظة: بامكانك ترسم على الورق أو باستخدام برنامج في الكمبيوتر او باستخدام الـTablet على ان يكون العمل من صنعك، يعني مو تعديل على صورة.

جوائز المسابقة:

جهاز PSP Go مع ذاكرة 16 GB مقدم من شركة سوني. وطبعاً لا تنسى عرض سوني اللي يخليك تحمّل 10 ألعاب كامله مجاناً!

جهازين PSP Go مع ذاكرة 16 GB وبطاقات شراء من متجر PSN. التفاصيل في موضوع الجوائز الاضافية.

شروط المشاركة:

• ان تكون مقيم في السعودية.
• ان تكون الشخصية المرسومه هي حصرية لجهاز سوني بلايستيشن.
• ان تكون شخصية سعودي قيمر موجوده في الصورة مع الشخصية اللي تختارها ومرسومه بيدك، وتكون على شكل شخصيه (يعني تركّب له جسم اذا احتجت). الرجاء عدم نسخ شعار الموقع نفسه.
• مسموح لك المشاركه في رسمه واحده فقط، وتقدر اذا حبيت تغيّر الرسمه اللي شاركت فيها.
• ان الشي اللي بيسوونه الشخصيتين سوا يكون شي نقدر ننشره في الموقع طبعاً.

كيفية ارسال مشاركتك:

ارسل رسمتك الى contest @ saudigamer .com (بدون مسافات)

آخر تاريخ لاستلام المشاركات:

بنستمر في استقبال المشاركات الى تاريخ 7 July الى تاريخ 14 July، و بنعلن عن الفايز في بعد الحلقة 73 ان شاءالله ونرسل له الجائزه بعدها مباشرة.

طريقة اختيار الفائزين:

فريق بودكاست سعودي قيمر بيكون الحكم على المشاركات، و بيختار الرسمة الفائزة، ومن ثم نرسل الجائزة للفائز باستخدام احدى شركات الشحن.

تقديم:

مشهور الدبيان، جميل عبدالأحد، فيصل، أحمد الأحمري، طارق الدخيل

نناقش في هذه الحلقة:

مؤتمرات واحداث ومفاجئات معرض E3، تجربتنا للـPlaystation Move، أول لعبة اكس بوكس سعودية، والمزيد!

• مؤتمر مايكروسوفت: من 00:15
• مؤتمر EA:من 00:55
• مؤتمر Ubisoft: من 01:10
• مؤتمر Nintendo: من 01:23
• مؤتمر Sony: من 01:49
• مؤتمر Konami: من 02:19

الروابط المذكورة في الحلقة:

• لعبة الـxbox السعوديه (لسى ما نزلت)
• فيديو: ديمو Mortal Kombat الجديد (مورتال كومبات)

ملاحظة: هذولي الروابط اللي قلنا اننا بنحطها في الموضوع. لو حطينا روابط كل المقاطع اللي تكلمنا عنها بيصير طول الموضوع 2 كيلو

ومع ان الحضور كان قليل  (كنا كلنا تقريباً 10)، الا ان هالشي خلانا نقدر كلنا نسولف سوا واستمتعنا كثير باللقاء صراحة. ونتمنى في حال تكرار هاللقاءات المرات الجايه انه يكون الحضور أكثر (يمكن الوقت -الخميس العصر- كان سبب عدم حضور الكثيرين).

هذي بعض صور اللقاء:

من اليمين لليسار: طارق الدخيل، أحمد الأحمري، فيصل

محمد النشار (من بودكاست Tech FTW) و عبدالله الدريعان (من بودكاست على طاري)

مشهور، طارق، احمد، فيصل، محمد الشريف، واحد نسيت اسمه >.<

يوسف العيد، عبدالله حامد

سامي الرميح، فيصل، محمد الشريف

طارق، سامي، فيصل

ونتمنى نشوفك انت في اللقاءات القادمة ان شاءالله سواء كانت في الرياض او مدينه ثانيه

مافيه أي مناسبة للاجتماع، مجرد اجتماع خفيف نبي نتعرف فيه على بعض ونسولف وجها لوجه.

بنتواجد ان شاءالله انا وفيصل واحمد الاحمري وطارق الدخيل (جميل ما يقدر يحضر لانه بجده)، ونتمنى انك تكون معنا.

بالمناسبة، بتكون اول مره يلتقي فيها فيصل و احمد وطارق وجها لوجه، فرصه تشوف لك شوية دراما. يمكن يصير فيه دموع بعد. :p

بامكانك تأكد حضورك في صفحة اجتماعنا في الفيسبوك.

و لا تدققون واجد على المذيع و المذيعه، بتشوفون اسئله غريبه عجيبه في اللقاء

راح نبدأ بالعد التنازلي للمراكز الخمسة الأولى في المسابقة و التي تميزت عن غيرها و هي كالتالي:

المركز الخامس:

من تصوير Ren Azuma و هي صورة اليد الموجوده في غلاف لعبة Left 4 dead.

الصورة متعوب عليها و تبدو واقعية الى حد كبير و لو ان جوده و نقاء الصورة كان أفضل كان من الممكن الحصول على مرتبه اعلى … مبروك Ren لقد نلت المركز الخامس!!

المركز الرابع:

من تصوير الأخ Rakan Masoudi و هو يصور الكعكة الموجوده في لعبة Portal  كما انه جعل التصوير يبدو كأنه منظور الشخص الأول حيث لا يظهر إلا ايديه و هو جاهز للإلتهام …. لو بس شاركتنا الكيكه بدل ما تجوعنا كان عطيناك المركز الاول!!  مبروك راكان على المركز الرابع.

المركز الثالث:

لقد تعادل في هذا المركز شخصان و هم (سلطان الماضي) و (HackeD Is My joP sfd) لا تسألوني هو كذه كاتب اسمه.

هذه هي صورة الأخ سلطان الماضي يظهر فيه النبته الخضراء و الحمراء و الموجوده في سلسلة ريزيدنت ايفل و صندوق بداخله مسدس ايضا مثل السلسلة.. الفكره حلوة و التطبيق احلى … بس ودي اعرف كيف لون النبته بالأحمر.

و هذه الصورة الأخرى التي شاركت المركز الثالث و هي بعدسة الأخ HackeD Is My joP sfd و هي تشبه جنود العرب في لعبة cod4  كما لفت انتباهنا النار المتناثر لعله يحاكي الدمار و الانفجار في المنطقة… نحييك على هذه الصورة و مشهور اكثر واحد عجبته الصورة.

المركز الثاني:

بعدسة الأخ  محمد العويد و هو يقلد البائع في لعبة ريزدنت ايفل 4 الفكرة كانت حلوة و بسيطة جدا للتنفيذ و لكن النتيجة جميله و يشبه بائع ريزدنت ايفل الى حد كبير… مبروك المركز الثاني.

المركز الأول:

بعدسة Laughing Guy الصورة اذهلتنا من كل النواحي بدون استثناء مثل نقاء الصورة و طريقة الإخراج و المكان و الملابس و قد يسأل البعض وين الورقة الي مكتوب عليها سعودي قيمر فهي موجودة على الصندوق الموجود في الخلفية بطريقة لا تشوه الصوره:

الصورة تحاكي لعبة ميتل قير 4 و لكن في رأيي ايضا تحاكي cod4 بشكل كبير .. و لكن على اية حال تستحق المركز الأول بجدااااره … الف مبروك ايها الرجل الضاحك على المركز الأول و الجائزة!!

الصور الأخرى المشاركة:

بعدسة ابوفهد و هي جميلة و لكن لم نستطيع تحديد ما هي اللعبة المقصود بها.

بعدسة يوسف البلوي و حسب الايميل المقصود ان الشخصية تقليد شكل الزومبي و لكنه يذكرني اكثر بالأنميشن Princess mononoke

بعدسة عبدالعزيز الزهراني و هو أول من ارسل صوره للمشاركة و لكن حظا اوفر في المره القادمة.

abduallh AL-ibrahim صور اليد الموجود في لتل بق بلانت … بس مدري وش اقول.

abdu alraheem ALMOHJTY يقول هذا من لعبة pepsi man

صورة جميلة جدا من بوحمد و كنا نتوقع له ان يأخذ مركز ضمن الخمسة الأوائل لأن الفكره كانت رائعه جدا و نحييه على المجهود.

Kaled alwabel مصور بمنظور الشخص الأول و لكن ياريت لو كان في منظر افضل من جدار.

من الأخHussien H2 3 و هو يقلد منظر من لعبة LBP ايضا فكره جديدة.

الصور المستبعده:

و هي الصور التي خالفت القوانين و لم تدخل الترشيح

صوره من عبدالملك زبيله جميلة جدا و لكن ورقة سعودي قيمر لم تكن بداخل الصوره نفسها و إنما تم إدخالها.

صورة رائعه من BigBoss 3zoz و لكن ورقة سعودي قيمر لم تكن بداخل الصوره و تم إدخالها.

منظر جميل من Hussien H2 و لكن كلمة سعودي قيمر غير موجوده.

صورة الجوكر من amoona al lzooza و لكن تم إدخال الكلمة و لم تكن موجوده في الأصل.

صورة للجوكر مره اخرى من abdalkader alnajar و لكن كلمة سعودي قيمر غير موجوده.
و هذه هي جميع الصور المشاركة في المسابقة … كلها محاولات جميلة.

و للذين لم يفوزوا بمركز لا تيأسوا انشاء الله المسابقات جاية كثير و راح تكون في فرص اخرى.

و السلام عليكم و رحمة الله و بركاته.

كيفية المشاركة:

صوّر صوره لها علاقه بالالعاب الكمبيوتر، سواء صورتك و انت مقلّد شخصيه معيّنه او صورة لمنظر يشبه منظر في لعبه، او صورة شي مسوّيه انت يمثّل شي في لعبه. اهم شي تكون الصوره من تصويرك، و الشي اللي تصوره من ابداعك.

بعد ما تصوّر الصورة، ارفقها برساله و ارسلها على البريد الالكتروني info @ saudigamer.com بعنوان “مسابقة سعودي قيمر الصيفية” عشان نميّزها عن الرسايل الباقيه.

جائزة المسابقة:

لعبتين اصليتين من اختيارك على جهازك المفضّل، بشرط انها تكون النسخه العاديه من اللعبه. يعني العاب يجي معها ضافات (زي Rock band او Wii fit) و الاصدارات الخاصة من الالعاب (special edition او collector edition) مستبعده. نبيك تنبسط بالصيف، مو تطفّرنا. P:

شروط المشاركة:

• ان تكون مقيم في السعودية فقط، لان شحن الجائزه لخارج السعودية غالي
• ان يكون في الصوره ورقه مكتوب عليها بخط يدك “SaudiGamer.com” عشان نعرف انها من تصويرك.
• مسموح لك المشاركه في صوره واحده فقط.
• انك ما تسوي اي تعديل على الصورة باستخدام اي برنامج تحرير للصور زي فوتوشوب. اي صوره مشبوهه بنستبعدها على طول.
• ان تكون صوره محترمه نقدر ننشرها بالموقع، يعني لا تلبّس شغالتكم لبس لارا كروفت و تصورها لنا.

و بس

طريقة اختيار الفائز:

فريق بودكاست سعودي قيمر بيكون الحكم على المشاركات، و بنختار الصورة الافضل.

آخر تاريخ لاستلام المشاركات:

بنستمر في استقبال المشاركات الى تاريخ 24 July، و بنعلن عن الفايز في الحلقة 28 ان شاءالله.