محمد الشريف
في واحد من أغرب المشاريع، أعلن اليوم المطوّر Brand & Grotqesque عن مشروع لمنتج. المنتج هذا هو عبارة عن اكسسوار يشفط دم من جسمك بواسطة ابرة كل ما انضربت في اللعبة اللي تلعبها. ايه، ابرة تشفط من دمك كل ما نقص دمك في اللعبة.
اسم المنتج العجيب هذا Blood Sport. في فقرة الشرح عن المنتج يقول صاحب المشروع:
” منتج بيرفع الحماس في عالم الألعاب، بحيث كل ما ينقص دمك في اللعبة، ينقص دمك في الحقيقة”.
المشروع هذا قفلوه أصحاب موقع Kickstarter (الموقع اللي يستضيف المشاريع هذي) بعد ست أيام من اطلاقه. سبب الاغلاق هو ان المنتج هذا خطير طبعاً، ولكن أصحاب المشروع يدافعون عنه ويقولون انهم ما راح يبيعونها لعامة الناس وبيخلونها للمشاريع الخيرية فقط. يقولون:
” حنا مالنا علاقة بالجهات الخيرية ولا بشركات صناعة الألعاب، حنا بكل بساطة نكوّن جهاز ألعاب ناخذه حول الدولة (كندا) بحيث يستخدمونه الناس كوسيلة للتبرع بالدم. حنا نهدف اننا نخلي الجيمرز يستوعبون أهميّة هذا العمل في الوقت اللي يسوون فيه الشي اللي يحبونه (يقصد اللعب)”.
“حنا ما سوينا اختراع طبي جديد ولا عندنا نية نبيع هالمنتج. كل اللي نحاول نسويه اننا نكوّن أفضل تجربة لعب ممكنة، وفي نفس الوقت نساعد الناس اللي يحتاجون (يقصد الناس اللي يحتاجون التبرع بالدم)”.
أخيرًا، موقع كيك ستارتر الى الآن ما أعلن سبب ايقافه للمشروع هذا. تواصلت قنوات الأخبار مع أصحاب الموقع لكنهم قالوا انهم ما راح يعلقون على هذا الموضوع.
شفت أشياء غريبة عجيبة في حياتي الجيمرية. هذا واحد منها بكل تأكيد. وش رأيك أنت؟
