Saudi Gamer
اذا اجتمعت أنت وأخوياك الرهيبين في استراحة، ولعبتوا كورة قدم وقام كل واحد فيكم يستعرض مهاراته: اللي يستلم الكورة ويروح لطرف الملعب ويدف الكورة قدامه خمس أمتار ويركض وراها آخرتها اذا وصل الباب يسطّح الكورة – وفي رواية يصيد حمام-، واللي يسحّب فيكم واحد واحد واذا وصل عند الباب برضو يكرر نفس النهاية التعيسة، أو الأسوأ من هذا كله: الديكتاتوري اللي يخلي البزران يمسكون حارس ويمزعهم واحد واحد، واذا سألته ليه يقولك: عشان يصيرون رجال!
بعد ما تنتهي هالأحداث الحزينة، واللي تصير في كل استراحة سعودية، تبدأ عملية البحث والتنقيب عن لعبة تجلس أنت وأخوياك تلعبونها وتتحدون بعضكم فيها. اليوم بنختار لكم أفضل لعبة في هذا الموقف.
Divekick لعبة المضاربات الاستهبالية اللي ممكن تسهر عليها أنت وأخوياك طول الليل في الاستراحة. تتميّز هذي اللعبة بالذات بكثرة الاستهبال فيها، خصوصاً على ستريت فايتر. Wii Party U واللي تحتوي على أكثر من 80 لعبة بسيطة كلها تم صناعتها للعب الجماعي، بالاضافة الى دمج Wii U Gamepad.
Rayman Legends من أفضل ألعاب الاستراحات على الاطلاق، واللي تقدر تلعب فيها على أربع لاعبين وفيها أنواع وأشكال المراحل الرهيبة والمضحكة، واللي تم تصميمها بشكل خرافي. Tower Fall بشكلها الكلاسيكي الرهيب وطريقة لعبها الجماعية البحتة ميّزتها عن كل هالنوع من الألعاب، بحيث تقدر تلعبها أنت وأخوياك لساعات وساعات وأنتم تضحكون على تصرفات بعض.
Mario 3D World هي أفضل لعبة استراحات لعبناها ذي السنة. أكثر لعبة تستمتع فيها أنت وأخوياك في استراحة هي ماريو. تميزت ماريو بأشياء كثيرة: أفضل تجربة جماعية، تصميم مراحل ممتاز، شخصيات فكاهية ورهيبة، تحكم بسيط بامكان الكل يفهم له، رسومات ممتازة. كل هالأسباب اجتمعت فيه لعبة وحدة خرافية.
ننصحك تلعب هاللعبة الخرافية مع أخوياك اذا طلعتوا استراحة، وانك تشيل فكرة انك بتصير الظاهرة السعودية القادمة في كرة القدم.
وش رأيك في Mario 3D World؟ ووش أكثر لعبة استراحات أعجبتك هذي السنة؟ شاركنا رأيك بالتعليقات!
