محمد الشريف
تشوف الصورة؟ دقّق فيها أكثر. لاحظت شي؟ ايه، تشبه مهمات VR Missions في ميتال جير سوليد.
Volume، لعبة جديدة تم الاعلان عنها في أغسطس 2013 لكن قليل اللي انتبهوا لها، من Mike Bithell، المطوّر اللي سوا لنا لعبة Thomas Was Alone، الآن يشتغل على لعبة طموحة جداً.
وش هي لعبة فوليوم؟ فوليوم هي لعبة تخفّي من الطراز “الميتال جيري”. بطل اللعبة، Locksely، ما يذبح الناس، اللي يقدر يسويه انه يتسلّل بين الأعداء، ويشتّت انتباهم بحيث يطلعون من أماكنهم وتصير تقدر تتقدم في المرحلة. الأعداء يقدرون ينتبهون لوجودك مو بس اذا شافوك، لكن بامكانهم يسمعون صوت خطواتك برضو، تقدر تقول ان فيه تركيز كبير على “الأصوات” في اللعبة. هدفك في المرحلة انك توصل للهدف بدون ما يكشفونك الأعداء.
اللعبة بيكون فيها مراحل كثيرة مرة، لكن المراحل بتكون عبارة عن “بيئات” لها نفس المظهر والستايل، لكن تصميم المرحلة نفسه يختلف. تقدر تقول ان هذا الشي مثل VR Missions في ميتال جير بالتمام. اللعبة برضو بيكون فيها تكوين مراحل من اللاعبين نفسهم، وهذي ميزة لو تم نجحت بتطوّل عمر اللعبة وتشهرها لفترة طويلة، وهذا اللي يتمناه مايك من لعبته القادمة.
كل هالمعلومات ممكن تكون غير مثيرة للاهتمام، الين ما تشوف الفيديو الرائع:
بطريقة اللعب هذي، والموسيقى التصويرية الجبّارة، أقدر أقول ان هذي من أكثر الألعاب اللي بأتحمس لها في 2014. نعم اللعبة شكلها بسيطة، لكنها بسيطة لان مطوّرها مطوّر مستقل ولا عنده الميزانيات الخيالية اللي تلقاها عند الشركات الكبيرة.
لكن هذا مو معناته ان اللعبة بسيطة وبتكون رخيصة، مطوّر اللعبة يقول ان نجاح لعبته توماس واز ألون جاب له فلوس تساوي ميزانية فوليوم مرتين، وهذا -على حسب كلامه- بيزيد فرص نجاح لعبته الجديدة.
بالنسبة للقصة وموقع أحداثها، فراح تكون في المستقبل. احداث اللعبة بتكون في انجلترا، بحيث دارت الدنيا على انجلترا وساءت أوضاعها الى درجة كبيرة، وان فيه دول ظهرت جنبها وصارت تضايقها وتضطهدها، وان الناس صارت ضجرة بالوضع اللي عايشة فيه، لذلك قرروا يسوون ثورة على الظلم اللي يصير لهم.
وين دور بطل اللعبة لوكسلي من هذا؟ لوكسلي يبدأ يعلّم الناس السرقة وغيرها من أعمال الشغب، عن طريق “بث” يسويه من خلال أجهزة معيّنة. يتم اكتشاف أعمال لوكسلي، وتبدأ مطاردته من قبل قوّات Danny Wallace، اللي هو الشرّير حق اللعبة. تتوالى الأحداث بعد كذا الين ما يصير لوكسلي “رمز بطولي” بالنسبة للناس المظلومة.
على ان اللعبة من مطوّر مستقل، الا انها تبدو لعبة طموحة جداً، واذا نجحت بتجذب انتباه الكثير من اللاعبين. بتنزل اللعبة في 2014، وبتنزل على PS4 وPS Vita أولاً، بعدها بيسوون لها بورت للبي سي والماك. لسّا ما حدد تاريخ ثابت الى الآن.
الى ما تنزل اللعبة، وحسب ما جبته لك من معلومات، وش رايك باللعبة؟
بارعة
ابراهيم سليمان
