مسابقة الكنكت، فرصتك لربح الحزمه الجديده للاكس بوكس مع كنكت!
هذي المسابقه اللي وعدنا فيها سابقاً. المسابقة برعاية مايكروسوفت السعوديه وجوائزها جدا مغريه صراحه وهي الحزمه اللي تشوفها في الصوره: اكس بوكس 360 الجديد + جهاز كنكت (Kinect) + لعبة كنكت أدفنشرز (Kinect Adventures)! و مو حزمه وحده حزمتين بعد!
كيف تشارك:
ارسل لنا فكرة استخدام معيّنه للكنكت في الالعاب سواء في الألعاب العادية أو الألعاب الخاصة للكنكت (سواء لعبه موجوده حالياً أو لعبه خياليه)، وادعم فكرتك بشرحها بالصور (تصور نفسك مثلاً وانت تسوي حركه للكنكت) أو الفيديو (الفيديو ممكن يكون وانت تتكلم وتشرح الفكره حقتك وكيف تنفذها وانت تلعب). في كل الحالتين لازم يكون فيه أحد بالصوره يوضّح الحركه المقصوده في فكرته.
مثال لفكره: ترمي قنابل في كول أوف دوتي عن طريق انك تسوي حركه بيدك كأنك ترمي قنبله صدق. فكره ثانيه: تجلس على الكرسي وتسوي نفسك كأنك ماسك دركسون سياره وتخلي رجلك في وضعية كأنك تدعس بنزين وتسوق السياره في اللعبه.
هذي مجرد مثالين بسيطات. فيه أفكار كثيره ممكن يتم استغلال الكنكت فيها، ونبي نعرف فكرتك.
ارسل فكرتك مع الصور أو الفيديو اللي يشرحها الى العنوان التالي kinect @ saudigamer.com
ما زال الموضوع غير واضح بالنسبه لك؟ شف الفيديو:
جوائز المسابقة:
- أفضل فكره مدعومه بصوره توضّحها: حزمة أكس بوكس 360 الجديد مع الكنكت ولعبه مجاناً.
- أفضل فكره مدعومه بفيديو يوضّحها: حزمة أكس بوكس 360 الجديد مع الكنكت ولعبه مجاناً.
طريقة اختيار الفائزين:
الأختيار بيكون عن طريق تقييم فريق سعودي قيمر لجميع المشاركات، ثم اختيار أفضل فكرتين.
شروط المشاركة:
- انك تكون مقيم في السعودية.
- انك ترفق مع فكرتك صوره وحده أو فيديو واحد على الأقل، ويكون طالع فيها شخص يوضّح كيف تتنفّذ الحركه اللي يقصدها في فكرته (مو شرط يكون نفس صاحب الفكره طالع في الصوره أو الفيديو. يعني لو شاركت بنت ممكن تصور اخوها الصغير مثلا).
- انه تكون الصوره أو الفيديو المرفق لتوضيح الفكره هو من تصوير صاحب المشاركه.
- يسمح بالمشاركه بفكره وحده فقط.
آخر موعد لاستلام المشاركات: مساء يوم الأربعاء المواقع 15 ديسمبر 2010.
بالتوفيق! 
مشهور من الحين ارسل الهديه اوكيه لاني فايز فايز >>> واثق من نفسه
ويفوز الافضل شباب يالله همتكم
جاري التفكير
لاحول ولا قوة الا بالله
مع انها صعبة جدا
وكالعادة افكار مسابقات سعودي جيمر ماتعجبني يعني اول وحده تصور نفسك ومدري وش
والثانيه رسمه
والثالثه كذا
ان شاء الله افوز راح اشد كل حيلي
لاني ماعندي اكس بوكس
بالتوفيق !
=)
تمنيت أنه تكون هناك مسابقة له عشاني كنت ناوي اشتريه وإن شاء الله أكون من الرابحين الاهم من كذا إن شاء الله مايكروسوفت تنفذ هذي الافكار
@PoKe
ههههههههههههههه اعجبني ردك حسيتك متعقّد من مسابقاتنا. بس حرام عليك هذي أسهل مسابقه سويناها ما يبي لها شي لو تفكر فيها شوي.
وصراحه ودنا المسابقات يكون فيها منافسه وتكون المشاركات يستمتع فيها اللي يشارك واللي يتفرج، مو بس سؤال وجواب وقرعه والمسابقات التقليديه الممله اللي ما ينبسط فيها الا اللي يفوز. ولا شرايك؟
مشهور
عندي اقتراح انك تحط موضوع هنا وتسميه ورشة عمل
وتحط جدول معين للالتزام
به
مثلا
عند انتهائك من جمع الافكار
تكتب
عدد الافكار: مثلا 5
>>>>>طبعا بدون كتابة الفكرة ماهي
بعدين اذا تم التطبيق
تكتب
عدد الافكار: 5
عدد الافكار التي تم تطبقيها :4
سبب عدم اكمال السبب المتبقي: ظروف المكان مثلا
هل تعتقد انك طبقتها بالشكل المناسب:نعم
بعدين بعد مايرسلها
يكتب
تم الارسال
وطبعا يكتب في الرسالة الي ارسل فيها الافكار اسمه بالموقع
بعدين يكتب : تم ارسال الرسالة بإسمي بالموقع والذي هو: PoKe
بعدين يكتب: اتمنى من القائمين على المسابقة التاكد من وصول المشاركة
بعدين يجي واحد من طاقم البودكاست ويأكد له
طبعا الفكرة هذي اقترحتها لزيادة التفاعل وكذا
+
اتمنى يكون فيه تكتم على الافكار لان الجائزة مغرية ولازم يكون فيه انانيه شوي
+
هل اقدر ادخل بالمنافسة على الصور والفيديو مع بعض واذا فزت بالاثنين مثلا اخذ بندل واحد والبندل الثاني يروح للمركز الثاني مثلا
لاني ابي ازيد فرص ربحي ^^
@مشهور الدبيان
اوافقك الرأي وبصراحه اعتقد لو كانت مجرد فكرة كان احسن
لان فيه ناس ماعندهم كامرات واعتقد الافضلية بتروح للصور والفيديوهات ذات الجودة الاعلى
وانا مابيدي الا اصور ببلاك بيري :p
@PoKe
اعتقد بتفقد الفكره بساطتها بهالطريقه، وبتتطلب متابعه كبيره ما نقدر عليها حالياً.
بامكانك المشاركه بالصور والفيديو وبنختار الأفضل منهم. والاختيار ما راح يكون على جودة الصور أو الفيديو، بيكون على جودة الفكره ومدى وضوحها كفكره، حتى لو كنت مصورها بكاميرا بلاكبيري. اهم شي تكون واضحه بقدر كافي اننا نميّز وش قاعد يصير بالضبط.
@مشهور الدبيان
اوكي شكرا على التوضيح
فجئتا عجبتني فكرة المسابقة بعد مافكرت شوي
اول رد جاء على رد فعل اللحظة وعدم تقبلي للفكرة وبدون التفكير !
وهذا شي غلط سويته اعتذر
+
خلي وحده من النسخ على جنب واكتب عليها الجائزة لـ PoKe <<<<واثق انه بيفوز XDD
ان شاء الله افوز بوحده من النسخ ^^
+
انا بسوي ستمية الف فيديو وثلاثمية الف صورة كيف راح يكون الوضع هل راح تختارون الافضل بين التسعمائة الف ؟
تم ارسال الفكره وان شاء الله تنال اعجابكم
لحظة لحظة لحظة
15 ديسمبر مو بعد 3 اسابيع؟!
اعتقد هالتاريخ حطيتوه كي تتجنبوا طلبات التأجيل
وصعبة تقدمون الموعد ولا كان طالبت بذلك بعنف
بس اتمنى لو انك غلط بدل ماتحط 5 حطيت 15
@PoKe
تقدر تشارك بمشاركه وحده فقط. اذا وصلتنا اكثر من مشاركه من نفس الشخص بنختار تلقائياً آخر مشاركه بغض النظر ان كانت أفضل مشاركه له أو لا.
التاريخ صحيح والفتره أطول من المعتاد عشان نعطي فرصه للجميع يشارك.
انت مافهمتني مشهور
بنفس الرسالة بحط
مثلا
3 افكار فيديو
وفكرتين صور
هذا قصدي فما ادري هل راح تختارون الافضل من بين ال5؟
عموما احس اني سببت ازعاج شوي اعتذر
@محمد
مشكور اخوي على سرعة تفاعلك. فكرتك ممتازه لكن الصوره المرفقه ماهي من تصويرك. يمكن ما كان هالشي واضح في الشروط (وضحته أكثر الآن)، لكن هي المقصد انه الشخص يجتهد في شرح فكرته.
كيف نرسل المشاركات
اووووووه اكس بوكس صراحه شي حلو ودي في من زمان خصوصا الكنكت بس يعني لو تساعدونا في الافكار و كذا خصوصا اني ما جربت الكنكت و ما عرفت بالظبط المطلوب هل هو تطوير الكنكت مثلا تعطي افكار للكنكت ولا للعب بالكنكت او زيادت حركات في الكنكت او تقدم فكره لتغير شكل الكنكت ولا كيف؟
كتوضيح اكثر
انا بسوي ثلاث افكار
لعبة شوتر
لعبة رياضة
لعبة سيارات
لكل وحده فيديو
وفكرتين
ماحددت الانواع للحين
وكلها صور
ماينفع تختارون الافضل من بينها؟
@مختار الخليفه
ممكن ترجع للامثله الموجوده في الموضوع للتوضيح عزيزي.
@PoKe
اخوي متوقعين مشاركات كثيره تجينا زي المشاركات اللي فاتت، صعبه نختار لكل واحد وش افضل مشاركه له. يا ليت تختار افضل مشاركه بنظرك وترسلها.
@مشهور الدبيان
اوكي الحين وضحت الصورة معي
وعذرا على كثرة اسئلتي ><"
شكرا ع المسابقة …..
طيب اخوي مشهور اذا الجائزة كنكت واكس بوكس
وشرط المسايقة فكرة عن كنكت طيب اللي
يبي يشارك 99% ان عنده اكس بوكس وكنكت
علشان يطبق الفكرة …… وش استفاد ؟؟
زي انا عندي ps3 وابغى افوز الجائزة من وين
اجيب اكس بوكس…….
لو يقلبون برنامج المسابقات ” جدار جبار ” لعبة كنكت بتطلع روعة ههههههههه
http://www.youtube.com/watch?v=WWTIHBF_95E
@لاتس
اخوي المطلوب منك فكره فقط، ما يحتاج يكون عندك لا الاكس بوكس ولا الكنكت.
طيب من اجيب لكم صور وانا اطبق الفكرة
يعني اطبقها بالهواء
هالمسسابقه ماتصلح لي XD
وشش ذا
مسابقاتكم صعبه :”( !
وشو صور نفسك وفيديو :/ !!
مششهور : اجل اسهل لعبه XP
ب التوفيق للي بيششارك :p
@لاتس
ايه عادي، حتى لو تسوي نفسك تطبقها قدام لعبه بالبلايستيشن ما عندك مشكله
وبعدين فعلياً الكنكت كله لعب في الهوا فلا تشيل هم
شكررا لتوضيحك ورحابة صدرك
ع أسئلتنا
من زمان عنكم
كله من هالدراسة ما جانا منها الا البلاوي 
الحين سؤال يطرح نفسه، الريجن بال والا ان تي سي؟؟
كالعاده المسابقة داخل السعودية فقط هذا اكثر شى يضايقني من البودكاست (عارف الرد التقليدي اللي تقولوه ) بس فية بودكاستات اخرى من السعوديه ومن نفس الشركات الداعمة والجوائز غير محصوره على السعودية
تسلمون ما تقصرون : )
لكن ما دام الدعوة فيها ﻻزم احد بالصورة ،
شكلها مو من نصيب البنات xD ..
موفقين جميعا ..
@B!G B3N
Pal
@reomaster
كلامك صحيح. الاسباب اللي عندنا هي خاصه في موقعنا فقط.
آسف اخوي ادري انه شي يضايق، لكن صدقني ما حطيناها بدون بسبب.
@Shoaa Khalid
ليش؟ عادي مثل ما ذكرنا في الشروط ممكن شخص ثاني يكون طالع في الصوره. يعني تقدر البنت تصور اخوها الصغير او اي واحد ثاني بدالها
كتبت توضيح أكثر في الموضوع لعله يساعد.
يامشهور هل راح يتم عرض الفيديو او الصورة للمشاهدين؟
او فقط تشاهدونها انتم؟
@خالد
راح نعرض المشاركات بعد اعلان الفائزين.
تم المشاركة وارسالها الى البريد الالكتروني
وبالتوفيق للجميع ..~
معليش مشهور لكن عندي طلب اتمنى ما يضايقك، وهو انك تحط مواصفات الجهاز بتحديث للتدوينة ، (كم جيجا، كم يدتحكم، الخ)
والاهم ليش ما تقط انت والتيم وتشترون لنا جهاز ثالث <<< بيتلفع خخخ
طبعا تراي امزح بآخر سطر
طيب الحين لازم اصور نفسي وانا اقلد اللعبه اثناء اللعب ولا لا
النظام الي بسويه الي هو اسوي الحركات على جنب واللعب بوقت اخر وبعدين ادمجهم مع بعض
الله یوفقکم شباب بس فکرتکم الحلوه هذی ماراح تنفع الا للتماسیح الی مثلی بس للنورس الناعم ماله حظ. یعنی علی قولتکم اللعبه مهی موزونه
مجرد رای مع ان الفکره روعه.
عندی فکره حلوه انشالله اقدمها ومشکورین حبیایبنا سعودی قیمر علی جهودکم.
يعني فكرتي انلغت يا مشهور
@B!G B3N
ما وصلتنا تفاصيل لكن هو الـstandard اللي بيكون موجود.
@اســ المحبة ـير
المهم انك توضّح الحركه سواء تطلع كلك كامل أو حتى يدك بس (اذا كانت الحركه تتسوى باليد او الذراع لحاله مثلا).
الدمج فكره حلوه بعد لو تبي تخلي الفيديو حقك اقرب للواقع.
@بندر الخطیب
يا ليت توضح قصدك ما فهمتك اخوي.
@محمد
عاجبتني جدا. الاشكاليه في كون الصوره فقط ماهي من تصويرك. ما اعتقد بتصعب عليك حتى لو تصور يدك لحالها زي ماهي طالعه بصورتك لكن تكون مع تلفزيون مو مع جوال، حتى لو تحط صوره بالتلفزيون زي الموجوده بالجوال وتسوي نفسك تتحكم فيها بالصوره.
لا تفوّتها على نفسك فكرتك حلوه بس انت اجتهد شوي بالصوره وصدقني بتصير منافسه
يعني الي يشارك لازم يكون عنده كنكت والجائزة كنكت xD
@مشهور الدبيان
طيب ارسلت الصوره والله يستر
اجل الان برسل الصوره اوكيه
السلام عليكم
أخوي مشهور عندي سؤال هل الفكرة تكون فكرة لعبه كامله أو فكرت حركة واحده
أنا بصراحه عندي فكرة لعبة
الحين يامشهور اذا قدر الله وفزت بالجائزة:) >مررة مصدق نفسه..واناا كنت في جدة ترسلون الجائزة ولا لازم المشارك في المسابقة يكون من الرياض
صراحه سوري احسس المسابقه صعبه شوي ..
انك تقعد تصور فديو نفسك و انت تلعب و حاله !
يعني كنكت يشوفون له مطورين يزبطونه حنى وش دخلنا فيه نعطيهم طريقة لعب جديده فيه !!
والشي الثاني فيه ناس ما يعرفون كيف يستعمل الـ كنكت اساسن !
كيف يقدر يمثل انه يلعب كنكت !
الواحد داخل مسابقة يربح شي مب عنده و شلون يشارك في مسابقة يربح فيها شي وهو عنده !
اتوقع المسابقات للحين افكارها مش ولا بد = [
يعني افكار مالها دخل في اللعب !
وحده ارسم و الثانيه اخترع طريقة لعب !
هذي اشياء مطورين مالنا دخل فيها !!
حنى مجرد لاعبين مابعد نوصل لـ الدرجه ذي ..
اسف حسيت اني خشيت بقوه و حماس ..
واو فكرة ممتازة اهنيكم عليها
يالله خلني ابلغ اخوي الصغير بالمسابقة لانه ازعجني يبغي الجهاز و بالافكار الي المفروض يسونها
يعطيكم العافية
@allawi
ما يحتاج يكون عندك كنكت عشان تشرح فكره للكنكت.
@xgr8sk8x
تكفي حركه وحده، لكن اذا بترسل فكره لعبه ما عندك مشكله برضه.
@germany
لا عادي اي منطقه من السعوديه، الفايز بنرسل الجائزه له.
@xS.Hx
ارجع اقول ثاني مره ما يحتاج يكون عندك كنكت عشان تعطي فكره للكنكت. اعتقد الكل عارف وش هو الكنكت وكيف يشتغل، ما يحتاج يشتريه عشان يعرف هالشي.
تم ارسال المشارك ان شاء الله تعجبكم الفكرة
فكرة المسابقة رهيبه خصوصا انه فيها منافسه وبعيده عن الطرق التقليديه القديمة
بس صعبة جدا << وهنا الحماس تجي فكره وتكون حلوه تقعد تفكر تقول لا اكيد فيه احسن منها
ويعطيك العافيه مشهور على الفترة الطويلة كذا الواحد يقدر يفكر مليون فكرة وقريبا برسل اكثر من فيديو واكثر من صورة (بس تكون لفكرة وحده عشان توضح الفكرة كاملة) وممكن فيديو واحد على حسب
وبالتوفيق لي 
وللجميع 
@هتان طويلي
ماهي صعبه ابداً بس يمكن ما وضّحتها بالشكل المطلوب. شكلي بسوي فيديو يوضّح المقصد وانزله.